BRAND HAMKORLAR UCHUN SHARTLAR VA QOIDALAR
Ushbu Shartlar va qoidalar (keyingi o‘rinlarda – “Shartlar”), shuningdek mazkur Shartlarda havola qilingan barcha hujjatlar, siz tomonidan qabul qilingandan so‘ng, “ORIFLAME” XK MChJ QK (keyingi o‘rinlarda – “Oriflame”, “biz”, “bizni”, “bizning”), O‘zbekiston Respublikasi, 100084, Toshkent shahri, Yunusobod tumani, Amir Temur ko‘chasi, 88A-uy manzilida ro‘yxatdan o‘tgan, 28.02.2019 yilda berilgan 693503-sonli ro‘yxatdan o‘tish raqamiga ega tashkilot va siz (keyingi o‘rinlarda – “siz”, “Brend Hamkor”) o‘rtasida yuridik jihatdan majburiy kuchga ega bo‘lgan bitimni (keyingi o‘rinlarda – “Bitim”) tashkil etadi.
Mazkur Bitim quyidagi hujjatlardan tashkil topgan:
(i)mazkur Shartlar, 2-ilovada keltirilgan shartnomadan voz kechish to‘g‘risidagi namunaviy bildirishnoma shakli bilan birga
(ii)1-ilovada keltirilgan Tadbirkorlik faoliyatini yuritish bo‘yicha Qo‘shimcha, u Bitimning ajralmas qismi hisoblanadi va ro‘yxatdan o‘tganingizda siz tomonidan qabul qilingan deb hisoblanadi. Mazkur Qo‘shimchada nazarda tutilgan huquq va majburiyatlar 10.2-bandda tavsiflangan Faollashuv hodisasi yuz bergan paytdan boshlab sizga nisbatan qo‘llaniladi, shuningdek unga ilova qilingan quyidagi hujjatlar ham qo‘llaniladi: Oriflame Mukofotlar Rejasi; Axloq kodeksi va xulq-atvor qoidalari; Siyosatlar va tartib-taomillar
Mazkur Shartlar sizning Oriflame’da ro‘yxatdan o‘tishingizni, https://uz.oriflame.com manzilida joylashgan Oriflame savdo platformasidan (keyingi o‘rinlarda – “Sayt”), shuningdek Oriflame mobil ilovasidan (keyingi o‘rinlarda – “Ilova”) foydalanishingizni (birgalikda “Do‘kon” deb yuritiladi) hamda [Hudud] hududida (“Hudud”) Mahsulotlarni xarid qilishingizni tartibga soladi.
Mazkur Shartlar siz va biz o‘rtamizda ilgari tuzilgan barcha shartnomalar, bayonotlar, kafolatlar va boshqa har qanday kelishuvlarning o‘rnini bosadi.
Mazkur Shartlarda Mahsulotlarni shaxsiy foydalanish uchun xarid qiluvchi shaxs sifatidagi huquqlaringiz haqida so‘z yuritilganda, siz “iste’molchi” yoki “xaridor” deb atalishingiz mumkin. Biroq biz bilan munosabatlaringizdagi shartnomaviy maqomingiz har qanday holatda ham “Brend Hamkor” maqomi bo‘lib qoladi. Ushbu maqom vaqt o‘tishi bilan o‘zgarmaydi, ammo 10-bo‘limda tavsiflangan Faollashuv yuz berganidan so‘ng sizga qo‘shimcha huquq va majburiyatlar tatbiq etiladi.
Biz mazkur Shartlarni Sayt va Ilovada joylashtirdik hamda ular bilan tanishish imkoniyatini ta’minladik. Shu sababli, mazkur Shartlarning nusxasini, shuningdek Bitim tarkibiga kiruvchi boshqa barcha hujjatlarni chop etib olishingiz yoki elektron shaklda saqlab qo‘yishingizni tavsiya etamiz.
1. TA’RIFLAR
Mazkur Shartlarda quyidagi ta’riflar qo‘llaniladi:
“Faollashuv” – mazkur Shartlarning 10.2-bandida ko‘rsatilgan holat bo‘lib, u yuz bergan paytdan boshlab sizga Tadbirkorlik faoliyatini yuritish bo‘yicha Qo‘shimchada nazarda tutilgan majburiyatlar tatbiq etiladi;
“Tadbirkorlik faoliyatini yuritish bo‘yicha Qo‘shimcha” – mazkur Shartlarning 1-ilovasida keltirilgan qo‘shimcha bo‘lib, unda Oriflame Mukofotlar Rejasi doirasida biznesni rivojlantirish dasturida ishtirok etuvchi Brend Hamkorlarga nisbatan qo‘llaniladigan qo‘shimcha shartlar, huquqlar va majburiyatlar bayon etilgan. Ushbu Qo‘shimcha sizga Faollashuv yuz bergan paytdan boshlab tatbiq etiladi;
“Kampaniya davri” – tegishli Oriflame Katalogi muqovasida ko‘rsatilgan davr bo‘lib, ushbu Katalogdagi takliflar aynan shu davr mobaynida amal qiladi;
“Axloq kodeksi va xulq-atvor qoidalari” – ushbu Bitimning ajralmas qismi bo‘lgan hamda Brend Hamkorning Oriflame, mijozlar va boshqa Brend Hamkorlar bilan munosabatlaridagi xatti-harakatlarini tartibga soluvchi majburiy qoidalar to‘plami. Axloq kodeksi va xulq-atvor qoidalari Faollashuv yuz bergan paytdan boshlab sizga nisbatan qo‘llaniladi. Hujjat bilan quyidagi havola orqali tanishish va uni yuklab olish mumkin: Axloq kodeksi;
“Tijorat dasturlari” – Oriflame tomonidan vaqti-vaqti bilan tashkil etiladigan va o‘tkaziladigan marketing dasturlari, savdoni rag‘batlantirish dasturlari hamda rag‘batlantirish aksiyalari;
“iste’molchi” – o‘zining savdo, tadbirkorlik, hunarmandchilik yoki kasbiy faoliyati doirasidan qisman tashqarida yoki asosan undan tashqarida harakat qiluvchi jismoniy shaxs;
“Mijozlarni qo‘llab-quvvatlash xizmati” – mijozlar va Brend Hamkorlarga xizmat ko‘rsatuvchi Oriflame bo‘linmasi bo‘lib, u bilan +998712050088 va/yoki info@oriflame.uz orqali bog‘lanish mumkin;
“Oriflame Katalogi”, “Katalog” – Oriflame tomonidan davriy ravishda chop etiladigan yoki elektron shaklda tarqatiladigan axborot-reklama nashri bo‘lib, unda, jumladan, Oriflame tomonidan taklif etilayotgan Mahsulotlar to‘g‘risidagi ma’lumotlar mavjud;
“Oriflame Guruhi” – Oriflame Holding Limited va ushbu kompaniya tomonidan bevosita yoki bilvosita nazorat qilinadigan har qanday yuridik shaxs;
“Oriflame Mukofotlar Rejasi” – Oriflame mukofotlar dasturida ishtirok etish shartlarini hamda unda nazarda tutilgan to‘lovlar va boshqa imtiyozlarni olish tartibini belgilovchi hujjat. Oriflame Mukofotlar Rejasi sizga faqat Faollashuv yuz berganidan so‘ng tatbiq etiladi. Hujjat matni bilan quyidagi havola orqali tanishish va uni yuklab olish mumkin: Oriflame Mukofotlar Rejasi va Tijorat dasturi;
“Oriflame Savdo Belgilari” – Oriflame nomi, Oriflame logotipi, shuningdek biz tomonidan ishlab chiqariladigan, targ‘ib qilinadigan, sotiladigan yoki tarqatiladigan Mahsulotlar hamda mahsulot liniyalarining nomlari;
“Shaxsiy ma’lumotlar” – Brend Hamkor sifatida ro‘yxatdan o‘tishda siz tomonidan taqdim etilgan ma’lumotlar, shuningdek keyinchalik vaqti-vaqti bilan bizga taqdim etishingiz mumkin bo‘lgan siz haqingizdagi boshqa ma’lumotlar.
“Shaxsiy axborot” – mijozlar, boshqa Brend Hamkorlar va siz Oriflame bilan munosabatlaringiz doirasida to‘playdigan yoki boshqa tarzda qayta ishlaydigan uchinchi shaxslarga bevosita yoki bilvosita taalluqli ma’lumotlar.
“Siyosatlar va tartib-taomillar” – Hududda amal qiluvchi, Oriflame Mukofotlar Rejasi va Tijorat dasturlari doirasida imtiyozlar taqdim etilishini tartibga soluvchi siyosatlar va tartib-taomillar bo‘lib, ular Tadbirkorlik faoliyatini yuritish bo‘yicha Qo‘shimchaning 3-ilovasi hisoblanadi hamda Faollashuv yuz berganidan so‘ng sizga nisbatan qo‘llaniladi. Hujjat bilan quyidagi havola orqali tanishish mumkin: Oriflame Mukofotlar Rejasi va Tijorat dasturi.
“Narxlar” – Mahsulotlarni xarid qilish uchun buyurtma rasmiylashtirilgan paytda amal qiluvchi va Oriflame tomonidan belgilangan narxlar.
“Mahsulotlar” – kosmetika mahsulotlari va ularga tegishli aksessuarlar, ayrim oziq-ovqat mahsulotlari va biologik faol oziq-ovqat qo‘shimchalari, shuningdek Oriflame Savdo Belgilari yoki boshqa savdo belgilari ostida taklif etiladigan boshqa tovarlar.
“Taklif qiling va daromad oling” – Do‘konda mavjud bo‘lgan funksional imkoniyat bo‘lib, u sizga Do‘konga havola qilingan shaxsiy havolani boshqa shaxslarga ulashish imkonini beradi.
“Hudud”: [●].
2. RO‘YXATDAN O‘TISH VA HISOB QAYDNOMANGIZ
2.1. Brend Hamkor sifatida ro‘yxatdan o‘tish sizning arizangizni (uni siz Do‘kon orqali mustaqil ravishda yoki sizning topshirig‘ingizga ko‘ra boshqa Brend Hamkor orqali topshirishingiz mumkin) qabul qilganimizdan va sizga yagona Brend Hamkor identifikatsiya raqami berilganidan so‘ng amalga oshiriladi.
2.2. Ro‘yxatdan o‘tish uchun siz to‘liq fuqarolik muomala layoqatiga ega bo‘lishingiz kerak. Agar sizning muomala layoqatingiz cheklangan bo‘lsa, ya’ni 16 yoshga to‘lgan, biroq 18 yoshga to‘lmagan bo‘lsangiz, qonuniy vakilingizning (masalan, ota-onangizning) tegishli tartibda rasmiylashtirilgan roziligi mavjud bo‘lgan taqdirda, shuningdek amaldagi qonunchilik talab qilgan hollarda tegishli davlat organining roziligi bilan ro‘yxatdan o‘tishingiz mumkin. Bunday rozilik ro‘yxatdan o‘tishingiz tasdiqlanishidan oldin taqdim etilishi kerak. Tegishli rozilik olingandan so‘ng, biz sizga ro‘yxatdan o‘tish tasdiqlanganligi haqida tabrik xabarini yuboramiz. Bunday rozilik mavjud bo‘lmagan taqdirda ro‘yxatdan o‘tish mumkin emas
Yuqoridagilarga qaramay, Tadbirkorlik faoliyatini yuritish bo‘yicha Qo‘shimchada nazarda tutilgan biznesni rivojlantirish imkoniyatlarida ishtirok etish amaldagi qonunchilikda belgilangan qo‘shimcha talablarga, jumladan eng kam yosh talablariga bog‘liq bo‘lishi mumkin. Agar amaldagi qonunchilikka ko‘ra bunday faoliyat ishtirokchisi kamida 18 yoshda bo‘lishi kerak bo‘lsa, 18 yoshga to‘lmagan Brend Hamkor Mahsulotlarni Iste’molchi sifatida xarid qilish va ulardan foydalanish huquqiga ega, biroq talab etilgan yoshga yetmaguncha va biz tomonidan ma’lum qilingan boshqa talablarga rioya qilmaguncha Tadbirkorlik faoliyatini yuritish bo‘yicha Qo‘shimchada nazarda tutilgan dasturda ishtirok etishga yoki uning doirasidagi har qanday imtiyozlarni olishga haqli emas.
2.3. Siz mazkur Bitimni tuzish, shuningdek uning shartlariga rioya qilish va ularni bajarish uchun zarur bo‘lgan to‘liq huquq layoqati va muomala layoqatiga ega ekanligingizni tasdiqlaysiz va kafolatlaysiz.
2.4. Bitim sizning hisob qaydnomangiz ro‘yxatdan o‘tkazilganligini tasdiqlovchi xabarni biz tomonidan siz ko‘rsatgan elektron pochta manzili yoki telefon raqamiga, tegishli Hududda mavjud bo‘lgan va ro‘yxatdan o‘tish jarayonida sizga ma’lum qilingan usul orqali yuborilgan paytdan e’tiboran tuzilgan hisoblanadi.
2.5. Sizning ro‘yxatdan o‘tishingiz shaxsiy xususiyatga ega bo‘lib, bizning oldindan yozma roziligimizsiz boshqa shaxsga topshirilishi, o‘tkazilishi yoki boshqa tarzda berilishi mumkin emas.
2.6. Halol bo‘lmagan tarzda ro‘yxatdan o‘tish va buyurtmalar joylashtirish (masalan, yolg‘on ma’lumotlardan foydalanish, uchinchi shaxslarning ma’lumotlarini ularning roziligisiz qo‘llash yoki firibgarlik maqsadlarida harakat qilish) qat’iyan taqiqlanadi. Oriflame bunday ro‘yxatdan o‘tishlarni yoki buyurtmalarni rad etish huquqini o‘zida saqlab qoladi. Shuningdek, agar ro‘yxatdan o‘tish amaldagi qonunchilikka, bizning qonuniy yoki komplayens majburiyatlarimizga zid bo‘lsa yoki arizachi ushbu Shartlarda belgilangan ro‘yxatdan o‘tish talablariga javob bermasa, biz ro‘yxatdan o‘tishni rad etish huquqiga egamiz.
2.7. Siz ishonchli parol tanlash, hisob qaydnomangizga oid ma’lumotlarning maxfiyligini saqlash va qurilmangizga kirishni cheklash uchun javobgarsiz. Shuningdek, hisob qaydnomangiz orqali amalga oshirilgan barcha harakatlar uchun ham javobgarsiz.
2.8. Do‘kondan foydalanishda siz noqonuniy hisoblangan har qanday kontentni joylashtirish, uzatish yoki boshqa tarzda taqdim etish huquqiga ega emassiz.
2.9. Do‘konga kirish va undan foydalanish uchun: (a) Saytdan foydalanish uchun internet tarmog‘iga ulangan qurilma va quyidagi veb-brauzerlardan birining amaldagi versiyasi talab etiladi: Google Chrome, Microsoft Edge yoki Apple Safari; (b) Ilovadan foydalanish uchun esa internetga ulangan va iOS yoki Android operatsion tizimining amaldagi versiyasi o‘rnatilgan mobil qurilma talab etiladi.
2.10. Biz vaqti-vaqti bilan Ilovaning to‘g‘ri ishlashi uchun zarur bo‘lgan yangilanishlarni chiqarishimiz mumkin. Bunday yangilanishlarni o‘rnatish zarurati haqida sizni xabardor qilamiz. Yangilanishlarni o‘rnatmaslik Ilovaning noto‘g‘ri ishlashiga olib kelishi mumkin. Do‘konning ayrim funksiyalaridan foydalanish uchun Java va/yoki JavaScript dasturiy ta’minotini o‘rnatish, shuningdek tegishli cookie-fayl parametrlarini sozlash talab qilinishi mumkin.
2.11. Siz istalgan vaqtda Do‘kondan foydalanishni to‘xtatishga haqlisiz. Biroq Do‘kondan foydalanishni to‘xtatishning o‘zi Bitimning bekor qilinishiga, hisob qaydnomangiz yopilishiga yoki Tadbirkorlik faoliyatini yuritish bo‘yicha Qo‘shimchaning sizga nisbatan qo‘llanishi tugashiga olib kelmaydi. Bitimning bekor qilinishi va amal qilish muddatining tugashi tartibi ushbu Shartlarning 13-bo‘limida tartibga solinadi.
2.12. Do‘konda uchinchi shaxslarga tegishli veb-saytlar yoki resurslarga havolalar bo‘lishi mumkin. Bunday havolalarning joylashtirilishi ushbu havolalar orqali mavjud bo‘lgan ma’lumotlar, mahsulotlar yoki xizmatlarni ma’qullashimizni anglatmaydi va biz ularning mazmuni yoki mavjudligi uchun javobgar emasmiz. Agar siz nomaqbul yoki xatolar mavjud deb hisoblagan kontentga duch kelsangiz, iltimos, bu haqda Mijozlarni qo‘llab-quvvatlash xizmatiga xabar bering.
3. BUYURTMANI RASMIYLASHTIRISH
3.1. Siz xarid qilmoqchi bo‘lgan Mahsulotlarni tanlash orqali Do‘kon orqali buyurtmalarni rasmiylashtirishingiz mumkin. Buyurtmani rasmiylashtirish sizning tanlangan Mahsulotlarni bizdan sotib olish haqidagi taklifingiz sifatida qabul qilinadi
3.2. Do‘konda joylashtirilgan ma’lumotlar, jumladan Mahsulotlar tavsifi va ko‘rsatilgan narxlar, shartnoma tuzishga taklif hisoblanadi.
3.3. Buyurtma quyidagi harakatlar bajarilgandan so‘ng rasmiylashtirilgan hisoblanadi:
3.3.1. siz xarid qilmoqchi bo‘lgan Mahsulotlarni “Savatga qo‘shish” (yoki shunga o‘xshash) funksiyasi orqali tanladingiz; bunda siz istalgan vaqtda savat tarkibini ko‘rishingiz va o‘zgartirishingiz, Mahsulotlar sonini tahrirlashingiz, alohida mahsulotlarni o‘chirishingiz yoki savatni to‘liq bo‘shatishingiz mumkin;
3.3.2.siz mazkur Shartlarni qabul qildingiz;
3.3.3. buyurtmangizni qabul qilish, qayta ishlash va bajarish uchun zarur bo‘lgan Shaxsiy ma’lumotlarni taqdim etdingiz;
3.3.4. o‘zingizga ma’qul yetkazib berish va to‘lov usulini tanladingiz; va
3.3.5. Do‘kondagi “Buyurtma berish va to‘lash” tugmasini (yoki shunga o‘xshash tugmani) bosish orqali buyurtmani tasdiqladingiz; bu bajarilishi majburiy bo‘lgan buyurtmani rasmiylashtirish hisoblanadi.
3.4. Onlayn buyurtma rasmiylashtirilgandan so‘ng uni Do‘kon orqali o‘zgartirish mumkin emas. O‘zgartirish kiritish uchun Mijozlarni qo‘llab-quvvatlash xizmatiga murojaat qilishingiz kerak. Agar buyurtmadan voz kechmoqchi bo‘lsangiz, 7-bo‘lim qoidalari bilan tanishing.
3.5. Buyurtmangiz biz tomonidan qabul qilingandan so‘ng sizga elektron pochta orqali buyurtma tasdiqnomasi yuboriladi. Ushbu tasdiqnoma oldi-sotdi shartnomasining kuchga kirganligini tasdiqlaydi.
3.6. Buyurtma tasdiqnomasi bilan birga sizga jo‘natilgan Mahsulotlar va buyurtmaning bajarilishiga oid boshqa zarur ma’lumotlar ham taqdim etiladi.
3.7. Do‘kon orqali buyurtma berishda quyidagilarni inobatga olish lozim:
(a) mazkur Shartlar hamda buyurtmangizni tasdiqlashimiz birgalikda siz va Oriflame o‘rtasida Mahsulotlarni oldi-sotdi qilish shartnomasini tashkil etadi va biz uning nusxasini saqlab qo‘yishingiz yoki chop etib olishingizni tavsiya qilamiz; (b) shartnoma faqat tegishli Hududda qo‘llaniladigan tilda tuzilishi mumkin; (c) Oriflame ushbu Shartlarning 16.1-bandida ko‘rsatilgan xulq-atvor kodekslariga rioya qiladi.
3.8. Rasmiylashtirilgan va to‘langan buyurtmalar siz tomonidan bekor qilinishi mumkin emas, bundan mazkur Shartlarning 7 va 8-bo‘limlarida nazarda tutilgan holatlar mustasno.
3.9. Buyurtmalar tizim vaqtincha ishlamayotgan davrlardan tashqari istalgan vaqtda rasmiylashtirilishi mumkin, jumladan Kampaniya davri yakunlanayotgan paytda yoki Do‘konda texnik yangilash ishlari olib borilayotgan vaqtda. Iste’molchilar huquqlarini himoya qilish to‘g‘risidagi amaldagi qonunchilik ruxsat bergan darajada, Oriflame bunday uzilishlar uchun javobgar bo‘lmaydi. Do‘konda taqdim etilgan Mahsulotlar va xizmatlar assortimenti, shuningdek ularning tavsifi hudud hamda buyurtma berilgan vaqtga qarab farq qilishi mumkin.
3.10. Barcha Mahsulotlar doimiy ravishda buyurtma uchun mavjud bo‘lavermaydi. Agar buyurtmani rasmiylashtirish paytida biror Mahsulot omborda mavjud bo‘lmasa, buyurtmani yakuniy tasdiqlashingizdan oldin sizga bu haqda xabar beriladi, shunda siz buyurtmani o‘zgartirishingiz yoki uni rasmiylashtirishdan voz kechishingiz mumkin.
3.11. Biz buyurtmani qabul qilishni rad etish huquqiga egamiz. Bunday holda, ushbu buyurtma uchun siz tomonidan to‘langan barcha mablag‘lar asossiz kechiktirmasdan qaytariladi.
3.12. Agar siz buyurtmani Iste’molchi sifatida emas, balki boshqa maqomda rasmiylashtirayotgan bo‘lsangiz, amaldagi qonunchilik talablarini hisobga olgan holda, agar siz mazkur Shartlarni buzayotganingizga ishonish uchun bizda asosli sabablar mavjud bo‘lsa, biz buyurtmangizni istalgan vaqtda bir tomonlama bekor qilish huquqini o‘zimizda saqlab qolamiz.
4. NARXLAR VA TO‘LOV TARTIBI
4.1. Agar boshqacha ko‘rsatilmagan bo‘lsa, Do‘konda aks ettirilgan Mahsulotlar narxlari buyurtma rasmiylashtirilgan paytda amal qiladigan to‘liq chakana narx hisoblanadi. Barcha narxlar mahalliy valyutada ko‘rsatiladi va amaldagi qo‘shilgan qiymat solig‘ini (QQS) o‘z ichiga oladi.
4.2. Buyurtmani tasdiqlashdan oldin biz sizga Mahsulotlarning umumiy qiymati, shuningdek har qanday qo‘shimcha to‘lovlar va yig‘imlar haqida ma’lumot taqdim etamiz.
4.3. Biz istalgan vaqtda Narxlarni o‘zgartirish huquqiga egamiz. Biroq, siz va biz o‘rtamizda boshqacha kelishuv bo‘lmasa, buyurtmangizga uni rasmiylashtirish vaqtida tasdiqlangan narx qo‘llaniladi.
4.4. Biz Do‘konda joylashtirilgan ma’lumotlarning aniqligi va dolzarbligini ta’minlash uchun oqilona choralarni ko‘ramiz, biroq xatolar yuz berishi mumkin. Biz har qanday noaniqliklarni, jumladan narxlar va Mahsulotlarning mavjudligi haqidagi ma’lumotlarni tuzatish huquqini o‘zimizda saqlab qolamiz. Agar narx buyurtmangiz qabul qilinishidan oldin tuzatilgan bo‘lsa, tuzatilgan narx qo‘llaniladi. Agar siz biror ma’lumot noto‘g‘ri deb hisoblasangiz, iltimos, bu haqda Mijozlarni qo‘llab-quvvatlash xizmatiga xabar bering.
4.5. Narxlarga tashish, yetkazib berish xarajatlari, shuningdek buyurtmani rasmiylashtirish jarayonida alohida ko‘rsatiladigan boshqa yig‘imlar va to‘lovlar kiritilmaydi. Bunday xarajatlar siz tanlagan yetkazib berish usuliga qarab farq qilishi mumkin.
4.6. Agar sizda maxsus taklif uchun kupon mavjud bo‘lsa va uni Do‘konda nazarda tutilgan tartibda tegishli kodni kiritish orqali faollashtirsangiz, uning qiymati buyurtmangiz summasidan chegirib tashlanadi. Kuponlar mustaqil pul qiymatiga ega emas va naqd pulga almashtirilmaydi. Buyurtmadan voz kechganingiz yoki buyurtma bekor qilingan taqdirda, qonunchilikda nazarda tutilgan huquqlaringiz to‘liq saqlanib qoladi.
4.7. Biz vaqti-vaqti bilan Mahsulotlarga chegirmalar taqdim etishimiz mumkin. Faollashuv yuz berganidan so‘ng sizga Oriflame Mukofotlar Rejasi, Siyosatlar va tartib-taomillar yoki Tijorat dasturlariga muvofiq qo‘shimcha chegirmalar ham taqdim etilishi mumkin. Narxlarni hisoblash bilan bog‘liq har qanday savollar bo‘yicha Mijozlarni qo‘llab-quvvatlash xizmatiga murojaat qilishingiz mumkin.
4.8. To‘lov bank debet yoki kredit kartasi, bank o‘tkazmasi yoki mazkur Shartlarda, Siyosatlar va tartib-taomillarda yoxud Do‘konda ko‘rsatilgan boshqa usullar orqali amalga oshirilishi mumkin. Asosiy to‘lov kartalarining aksariyati qabul qilinadi. Bank kartalaridan foydalangan holda onlayn to‘lovlarning xavfsizligini ta’minlash maqsadida barcha to‘lov ma’lumotlari shifrlangan shaklda uzatiladi. Oriflame bank kartalari ma’lumotlarini to‘lov industriyasi xavfsizlik standartlariga muvofiq qayta ishlovchi vakolatli to‘lov xizmatlari yetkazib beruvchilari bilan hamkorlik qiladi.
4.9. Sizning so‘rovingizga binoan va kechiktirilgan to‘lov shartlariga rioya qilingan taqdirda (agar bunday imkoniyat tegishli Hududda mavjud bo‘lsa), biz o‘z ixtiyorimizga ko‘ra xarid qilayotgan Mahsulotlaringiz uchun to‘lovni kechiktirish imkoniyatini taqdim etishimiz mumkin. To‘lovlarni undirish maqsadida biz uchinchi tomon xizmat ko‘rsatuvchi tashkilotlarni jalb qilish huquqiga egamiz. Shu munosabat bilan to‘lov hisob-fakturalari va to‘lovga oid xabarlar sizga bunday xizmat ko‘rsatuvchi tomonidan yuborilishi mumkin. Barcha hisob-fakturalar ularda ko‘rsatilgan muddatda to‘lanishi kerak. To‘lov kechiktirilgan taqdirda biz qonunchilikda nazarda tutilgan penya yoki foizlarni hisoblashga, shuningdek agar siz Mahsulotlarni Iste’molchi sifatida xarid qilmagan bo‘lsangiz, qarzdorlikni undirish bilan bog‘liq oqilona xarajatlarni undirishga haqlimiz.
4.10. Mavjud to‘lov usullari, jumladan kechiktirilgan to‘lov yoki kreditlash shartlari (agar mavjud bo‘lsa) haqidagi ma’lumotlar Sayt yoki Ilovada joylashtiriladi. Qo‘shimcha ma’lumot olish uchun Mijozlarni qo‘llab-quvvatlash xizmatiga murojaat qiling.
4.11. Agar biz bank kartasi orqali muntazam to‘lovlarni amalga oshirish imkoniyatini taqdim etsak, siz ushbu to‘lov usulini mustaqil ravishda tanlashingiz va uni aniq tasdiqlashingiz mumkin. Bunday holda keyingi to‘lovlar buyurtma rasmiylashtirilayotgan paytda sizning bank kartangiz orqali avtorizatsiya qilinadi, mablag‘lar esa buyurtma qilingan Mahsulotlar Oriflame tomonidan jo‘natilgan paytda yechib olinadi. Siz istalgan vaqtda profilingizdagi bank kartalarini boshqarish bo‘limi orqali muntazam to‘lovlardan voz kechishingiz mumkin. Agar biz Mahsulotlarni muntazam xarid qilish bo‘yicha obunalarni taklif qilsak, bunday obunalar qo‘shimcha shartlar bilan tartibga solinishi mumkin va ushbu shartlar obunani rasmiylashtirishdan oldin sizga taqdim etiladi hamda Do‘konda joylashtiriladi.
4.12. Siz hisob-fakturalarni elektron shaklda qabul qilishga rozilik bildirasiz.
5. YETKAZIB BERISH VA XAVFNING O‘TISHI
5.1. Buyurtma qilingan Mahsulotlar faqat Hudud doirasida yetkazib berilishi mumkin.
5.2. Oriflame Do‘kon orqali mavjud yetkazib berish usullari, taxminiy yetkazib berish muddatlari va yetkazib berish qiymati to‘g‘risida ma’lumot taqdim etadi. Yetkazib berish bilan bog‘liq har qanday cheklovlar haqida sizga buyurtmani rasmiylashtirish boshlanishidan kechiktirmay xabar beriladi.
5.3. Mahsulotlarni yetkazib berish manzili buyurtmani rasmiylashtirish vaqtida siz tanlagan manzil yoki qabul qilish punktidir. Agar jo‘natmaning og‘irligi belgilangan cheklovlardan oshib ketsa, logistika kompaniyasi sizga elektron pochta yoki matnli xabar orqali yetkazib berish amalga oshiriladigan topshirish punkti haqida ma’lumot beradi.
5.4. Biz buyurtmangizni imkon qadar qisqa muddatda qayta ishlash va yetkazib berish uchun oqilona sa’y-harakatlarni amalga oshiramiz hamda har qanday holatda ham buyurtma biz tomonidan tasdiqlangan kundan boshlab 30 (o‘ttiz) kundan kechiktirmay yetkazib berishga harakat qilamiz. Iste’molchilar huquqlarini himoya qilish to‘g‘risidagi amaldagi qonunchilik ruxsat bergan eng yuqori darajada, oqilona nazoratimizdan tashqaridagi holatlar sababli yuzaga kelgan yetkazib berishdagi kechikishlar uchun javobgar bo‘lmaymiz.
5.5. Mahsulotning yo‘qolishi yoki shikastlanishi xavfi, shuningdek unga bo‘lgan mulk huquqi Mahsulot sizga yoki sizning nomingizdan uni qabul qilayotgan shaxsga topshirilgan paytdan boshlab sizga o‘tadi.
5.6. Agar yetkazib berilmaslik, noto‘g‘ri yetkazib berish yoki yetkazib berishning kechikishi siz tomonidan noto‘g‘ri yoki to‘liq bo‘lmagan yetkazib berish ma’lumotlari (ism, familiya, manzil yoki boshqa zarur ma’lumotlar) taqdim etilishi natijasida yuzaga kelgan bo‘lsa, Oriflame buning uchun javobgar bo‘lmaydi.
5.7. Agar Mahsulot sizga tashish jarayonida yuzaga kelgan shikastlanishlar bilan yetkazib berilgan bo‘lsa, masalani zudlik bilan ko‘rib chiqishimiz uchun bu haqda imkon qadar tezroq Mijozlarni qo‘llab-quvvatlash xizmatiga xabar bering.
6. MAHSULOTLAR: TALABLARGA MUVOFIQLIK, XAVFSIZLIK VA NOJO‘YA REAKSIYALAR
6.1. Biz Mahsulotlarning shartnoma shartlariga hamda amaldagi qonunchilik talablariga, xususan iste’molchilar huquqlarini himoya qilish to‘g‘risidagi qonunchilikka muvofiqligi uchun javobgarmiz. Biz Oriflame kosmetika mahsulotlari EN ISO 22716:2007 Kosmetika mahsulotlari uchun Yaxshi ishlab chiqarish amaliyoti bo‘yicha yo‘riqnoma va Oriflame Biznes amaliyoti kodeksi talablariga muvofiq ishlab chiqarilishini kafolatlaymiz.
6.2. Amaldagi qonunchilik ruxsat bergan eng yuqori darajada, Katalog yoki Do‘konda joylashtirilgan Mahsulot tasvirlari faqat illyustrativ maqsadga ega. Amalda yetkazib berilgan Mahsulotning shakli, rangi yoki o‘lchamidagi sizning qurilmangizda ko‘rsatilgan tasvirlardan ozgina farqlar Mahsulotning nuqsoni hisoblanmaydi. Mazkur qoida Oriflame-ning Mahsulotlarning shartnoma shartlariga nomuvofiqligi uchun qonunchilikda belgilangan javobgarligini istisno qilmaydi va cheklamaydi.
6.3. Agar Mahsulot shartnoma shartlariga mos kelmasa, siz amaldagi qonunchilikda nazarda tutilgan huquqiy himoya vositalaridan foydalanishga haqlisiz. Bunday vositalar holatga qarab mahsulotni ta’mirlash, almashtirish, narxni mutanosib ravishda kamaytirish, to‘langan pul mablag‘larini qaytarish yoki shartnomani bekor qilishni o‘z ichiga olishi mumkin.
6.4. Agar siz Mahsulotdan foydalanish nojo‘ya reaksiya yoki sog‘liq bilan bog‘liq boshqa muammolarni keltirib chiqargan deb hisoblasangiz, bunday Mahsulotdan foydalanishni darhol to‘xtatishingiz va imkon qadar tezroq Mijozlarni qo‘llab-quvvatlash xizmatiga murojaat qilishingiz kerak. Tegishli holatni o‘rganish va mahsulot xavfsizligiga oid amaldagi talablar bo‘yicha majburiyatlarimizni bajarish maqsadida biz siz bilan bog‘lanib, qo‘shimcha ma’lumot so‘rashimiz mumkin.
6.5. Hudud qonunchiligida nazarda tutilgan huquqlaringiz to‘g‘risidagi ma’lumotlarni mahalliy Yevropa iste’molchilar markazi orqali ([havola]) yoki mamlakatingizdagi iste’molchilar huquqlarini himoya qilish bo‘yicha boshqa vakolatli davlat organidan olishingiz mumkin.
7. BUYURTMANI BEKOR QILISH HUQUQI
7.1. Mazkur 7-bo‘lim siz Mahsulotlarni Iste’molchi sifatida xarid qilgan hollarda qo‘llaniladi. Bunday hollarda siz quyida bayon etilgan qoidalarga muvofiq shartnomani bekor qilish bo‘yicha qonunchilikda nazarda tutilgan huquqlardan foydalanishingiz mumkin. Biz tegishli Hududda amal qiluvchi Mahsulotlardan voz kechish bo‘yicha barcha qoidalar va talablariga qat’iy rioya qilamiz.
7.2. Siz Mahsulotlarga oid buyurtmadan sabab ko‘rsatmasdan va quyida nazarda tutilgan xarajatlardan tashqari hech qanday xarajatlarni ko‘tarmagan holda, Mahsulotni yoki agar buyurtma bir nechta mahsulotni o‘z ichiga olgan bo‘lsa, oxirgi Mahsulot birligini o‘zingiz yoki sizning nomingizdan uni qabul qilgan shaxs olgan kundan boshlab 14 (o‘n to‘rt) kalendar kuni ichida bekor qilishga haqlisiz. Agar bekor qilish to‘g‘risidagi bildirishnoma buyurtmani qabul qilganimizni tasdiqlashimizdan oldin yuborilgan bo‘lsa, shartnoma tuzish haqidagi taklif majburiy kuchini yo‘qotadi.
7.3. Tovar sog‘liqni saqlash yoki gigiyena sabablari tufayli ochilgandan keyin qaytarilishi mumkin bo‘lmagan muhrlangan qadoqda yetkazib berilgan va ushbu qadoq yetkazib berilgandan keyin ochilgan bo‘lsa, bunday Mahsulotlarga nisbatan bekor qilish huquqi qo‘llanilmaydi. Bunday Mahsulotlar Do‘konda tegishli tarzda belgilab qo‘yiladi.
7.4. Buyurtmani bekor qilish uchun siz Mijozlarni qo‘llab-quvvatlash xizmatiga elektron pochta orqali murojaat qilishingiz, mazkur Shartlarning 2-ilovasida keltirilgan namunaviy bekor qilish shaklidan foydalanishingiz yoki bizni boshqa har qanday usul bilan xabardor qilishingiz mumkin, biroq bunda buyurtmadan voz kechish niyatingiz aniq va ravshan ifodalangan bo‘lishi kerak. Muayyan shakldan foydalanish majburiy emas.
7.5. Bekor qilish muddatiga rioya qilish uchun tegishli bildirishnomani 7.2-bandda ko‘rsatilgan muddat tugashidan oldin yuborish yetarli hisoblanadi. Agar siz bekor qilish to‘g‘risidagi bildirishnomani elektron pochta orqali yuborsangiz yoki onlayn bekor qilish funksiyasidan foydalansangiz, bekor qilish u yuborilgan yoki topshirilgan sanadan boshlab amalga oshirilgan hisoblanadi. Biz sizning bekor qilish haqidagi bildirishnomangiz olinganligini tasdiqlaymiz.
7.6. Sizga Mahsulot uchun to‘langan summa, shuningdek yetkazib berish xarajatlari qaytariladi. Biroq agar siz biz taklif qilgan eng arzon standart yetkazib berish usulidan qimmatroq yetkazib berish usulini tanlagan bo‘lsangiz, qo‘shimcha xarajatlar qaytarilmaydi. Biz Mahsulot qiymatining pasayishi uning xususiyati, tavsifi va ishlashini aniqlash uchun zarur bo‘lgan chegaralardan tashqarida foydalanilganligi natijasida yuzaga kelgan bo‘lsa, qaytariladigan summani kamaytirishga haqlimiz. Mablag‘lar 14 (o‘n to‘rt) kun ichida qaytariladi, biroq biz qaytarilayotgan Mahsulotni olgunimizcha yoki siz uning jo‘natilganligini tasdiqlovchi hujjatni taqdim etguningizcha (qaysi biri oldinroq yuz bersa), mablag‘larni qaytarishni ushlab turishga haqlimiz.
7.7. Pul mablag‘lari, siz buyurtmani rasmiylashtirishda foydalangan to‘lov usuli orqali qaytariladi, agar siz va biz o‘rtamizda boshqacha kelishuv bo‘lmasa. Har qanday holatda ham qaytarish siz uchun qo‘shimcha xarajatlarni keltirib chiqarmaydi.
7.8. Agar Mahsulot sizga yetkazib berilgan bo‘lsa, siz uni asossiz kechiktirmasdan va har qanday holatda ham buyurtmadan voz kechgan kundan boshlab 14 (o‘n to‘rt) kalendar kundan kechiktirmay bizga qaytarishingiz shart. Mahsulotni mazkur muddat tugashidan oldin jo‘natish muddatga rioya qilinganligini anglatadi. Agar Mahsulot nuqsonli bo‘lmasa, uni qaytarish bilan bog‘liq bevosita xarajatlar sizning zimmangizda bo‘ladi.
8. MAMNUNIYAT KAFOLATI
Biz Oriflame nomi ostida ishlab chiqariladigan har qanday Mahsulot sifatini kafolatlaymiz va biz tomonidan yoki buyurtmamiz asosida ishlab chiqarilgan Mahsulotlar eng yuqori sifat standartlariga muvofiq ekanligini tasdiqlaymiz. Biz Mahsulotlarimiz sizni to‘liq qoniqtirishiga ishonamiz. Shu munosabat bilan biz ixtiyoriy shartnomaviy Oriflame Mamnuniyat kafolatini (keyingi o‘rinlarda – “Mamnuniyat kafolati”) taqdim etamiz. Ushbu kafolat sizga to‘liq qoniqish hosil qilmagan har qanday Mahsulotni almashtirish yoki uning uchun to‘langan pul mablag‘larini qaytarib olish imkonini beradi. Pul mablag‘larini qaytarish talabi tegishli Mahsulotni olgan kundan boshlab 30 (o‘ttiz) kun ichida bildirilishi kerak. Mazkur Mamnuniyat kafolati qasddan shikastlangan yoki noto‘g‘ri foydalanilgan Mahsulotlarga nisbatan tatbiq etilmaydi. Mahsulotni qaytarish ushbu Shartlarning 7.8-bandiga muvofiq amalga oshiriladi. Pul mablag‘lari siz tomonidan Mahsulot uchun amalda to‘langan narx miqdorida qaytariladi. Mahsulotni qaytarish bilan bog‘liq xarajatlar sizning zimmangizda bo‘ladi. Agar boshqacha tartib alohida ma’lum qilinmagan bo‘lsa, qaytariladigan mablag‘ summasi sizning Oriflame hisob qaydnomangizga o‘tkaziladi. Mamnuniyat kafolati sizga qonunchilikda nazarda tutilgan huquqlardan tashqari qo‘shimcha ravishda va ixtiyoriy ravishda taqdim etiladi hamda bunday huquqlarni cheklamaydi, istisno qilmaydi yoki ularga ta’sir ko‘rsatmaydi. Jumladan, masofaviy oldi-sotdi shartnomasidan voz kechish bo‘yicha qonunchilikda belgilangan huquqlar; Mahsulot shartnoma shartlariga yoki amaldagi qonunchilik talablariga muvofiq bo‘lmagan taqdirda yuzaga keladigan huquqlar.
9. TAVSIYALAR BERISH VA YANGI ISHTIROKCHILARNI JALB QILISH
9.1. Agar tegishli Hududda bunday imkoniyat o‘chirib qo‘yilmagan yoki boshqa tarzda cheklanmagan bo‘lsa, Do‘kon sizga “Taklif qiling va daromad oling” funksiyasi orqali Do‘konga shaxsiy havolangizni boshqa shaxslar bilan ulashish imkonini beradi. Siz ushbu funksiyadan Brend Hamkor sifatida ro‘yxatdan o‘tgan paytdan boshlab foydalanishingiz mumkin. Tavsiya “Taklif qiling va daromad oling” havolasi yoki Oriflame tomonidan ushbu maqsadda taqdim etilgan boshqa vositalar orqali amalga oshirilishi mumkin. Do‘konda joylashtirilgan tegishli shartlar bajarilgan taqdirda, yangi shaxslarni muvaffaqiyatli jalb qilish sizga ayrim imtiyozlar, mukofotlar yoki reklama-marketing takliflarini olish huquqini berishi mumkin. Bunday imtiyozlar faqat amaldagi shartlar va qoidalarga muvofiq taqdim etiladi hamda siz va Oriflame o‘rtasida mehnat, agentlik, distribyutorlik yoki boshqa tadbirkorlik munosabatlarini yuzaga keltirmaydi. Bunday dasturlarda ishtirok etish ixtiyoriy hisoblanadi.
9.2. Havolani ulashishda, boshqa shaxsni Oriflame-ga qo‘shilishga tavsiya qilishda yoki Mahsulotlar hamda Oriflame bilan hamkorlik imkoniyatlarini boshqa tarzda targ‘ib qilishda siz quyidagilarga rioya qilishingiz shart:
9.2.1. o‘zingizni Oriflame xodimi, agenti, vakili yoki vakolatli distribyutori sifatida tanishtirmaslik, shuningdek Oriflame nomidan harakat qilmaslik va bunday taassurot uyg‘otmaslik;
9.2.2. daromad, foyda yoki turmush tarziga oid natijalar bo‘yicha haqiqiy yoki potensial ko‘rsatkichlar haqida, ular sizga yoki boshqa shaxslarga taalluqli bo‘lishidan qat’i nazar, hech qanday bayonot bermaslik;
9.2.3. Mahsulotlar haqida Oriflame tomonidan taqdim etilgan yoki tasdiqlangan materiallarda keltirilgan ma’lumotlardan tashqari hech qanday da’volarni bildirmaslik;
9.2.4. amaldagi qonunchilik talab qiladigan rozilikni bermagan shaxslarga elektron xabarlar yubormaslik hamda bunday rozilik qaytarib olingan taqdirda uni darhol inobatga olish;
9.2.5. amaldagi qonunchilik talablariga, xususan reklama va tijorat xabarlarini identifikatsiya qilishni tartibga soluvchi normalarga, shuningdek foydalanayotgan platformalarning foydalanish shartlariga rioya qilish.
9.3. Siz Oriflame nomidan muzokaralar olib borish yoki biron-bir shartnoma tuzish vakolatiga ega emassiz. Siz tomonidan jalb qilingan har qanday shaxs buyurtmalarni Oriflame tomonidan e’lon qilingan narxlar bo‘yicha bevosita Oriflame-da rasmiylashtiradi.
9.4. Agar siz ushbu 9-bo‘lim talablariga rioya qilmasangiz, biz sizning “Taklif qiling va daromad oling” funksiyasidan foydalanish huquqingizni vaqtincha to‘xtatib turish yoki bekor qilishga, shuningdek ushbu Shartlarning 13.5-bandida nazarda tutilgan asoslar mavjud bo‘lsa, Bitimni bekor qilishga haqlimiz. Bunday qarorni qabul qilishdan oldin biz sizni qarorimiz asoslari haqida xabardor qilish uchun oqilona choralarni ko‘ramiz va sizga o‘z tushuntirishlaringizni taqdim etish imkoniyatini beramiz.
10. TADBIRKORLIK FAOLIYATINI YURITISH BO‘YICHA QO‘SHIMCHANING KUCHGA KIRISHI
10.1. Tadbirkorlik faoliyatini yuritish bo‘yicha Qo‘shimcha Bitimning ajralmas qismi hisoblanadi. Ro‘yxatdan o‘tishda mazkur Shartlarni qabul qilish orqali siz Tadbirkorlik faoliyatini yuritish bo‘yicha Qo‘shimchani ham qabul qilasiz. Tadbirkorlik faoliyatini yuritish bo‘yicha Qo‘shimchani ro‘yxatdan o‘tkazish va qo‘llash uchun hech qanday to‘lov undirilmaydi.
10.2. Faollashuv siz tomonidan jalb qilingan shaxsning Oriflame-da ro‘yxatdan o‘tgan sanasida yuz beradi. Jalb qilish “Taklif qiling va daromad oling” havolasi yoki Oriflame tomonidan ushbu maqsadlar uchun taqdim etilgan boshqa vosita orqali amalga oshirilishi mumkin.
10.3. Tadbirkorlik faoliyatini yuritish bo‘yicha Qo‘shimcha va uning ilovalari, ya’ni Oriflame Mukofotlar Rejasi, Axloq kodeksi va xulq-atvor qoidalari hamda Siyosatlar va tartib-taomillar, Faollashuv yuz bergunga qadar sizga nisbatan qo‘llanilmaydi. Ushbu vaqtgacha sizga faqat mazkur Shartlar, jumladan 9-bo‘lim (“Tavsiyalar berish va yangi ishtirokchilarni jalb qilish”) tatbiq etiladi, mazkur bo‘lim siz tomonidan “Taklif qiling va daromad oling” funksiyasidan har qanday foydalanishni tartibga soladi. Faollashuv yuz bergan paytdan boshlab sizga Tadbirkorlik faoliyatini yuritish bo‘yicha Qo‘shimcha va uning ilovalari tatbiq etiladi hamda ularda belgilangan shartlar bajarilgan taqdirda siz Oriflame Mukofotlar Rejasi doirasida nazarda tutilgan imtiyozlar va mukofotlarni olish huquqiga ega bo‘lishingiz mumkin.
10.4. Faollashuv yuz berganidan keyin imkon qadar qisqa muddat ichida biz sizga (shakli bizning ixtiyorimiz bilan belgilanadi) Faollashuv yuz berganligini va Tadbirkorlik faoliyatini yuritish bo‘yicha Qo‘shimcha hamda u bilan bog‘liq hujjatlar sizga nisbatan qo‘llanila boshlaganligini tasdiqlovchi bildirishnoma yuboramiz.
11. SHAXSIY MA’LUMOTLAR VA MAXFIYLIK
11.1. Do‘kon orqali ma’lumot taqdim etar ekansiz, o‘zingiz haqingizda ishonchli, dolzarb va to‘liq ma’lumotlarni taqdim etish hamda zarurat tug‘ilganda ularni o‘z vaqtida yangilab borish majburiyatini olasiz. Biz Do‘kon orqali olingan Shaxsiy ma’lumotlarni amaldagi qonunchilik va quyidagi havola orqali tanishish mumkin bo‘lgan Oriflame Maxfiylik to‘g‘risidagi bildirishnomasiga muvofiq qayta ishlaymiz va saqlaymiz: ссылке.
11.2. Faollashuv yuz bergunga qadar, sizning “Taklif qiling va daromad oling” havolangiz orqali Oriflame-da ro‘yxatdan o‘tgan shaxslarning shaxsiy ma’lumotlari bo‘yicha yagona operator Oriflame hisoblanadi. Oriflame-ning onlayn vositalari orqali sizga bunday shaxslar haqidagi cheklangan hajmdagi ma’lumotlar taqdim etilishi mumkin, biroq siz ushbu ma’lumotlardan faqat mazkur vositalar doirasida va ular taqdim etilgan maqsadlar uchun foydalanishga haqlisiz. Siz ushbu ma’lumotlarni Oriflame-ning onlayn vositalaridan tashqariga eksport qilish, nusxalash, saqlash yoki boshqa tarzda foydalanish, shuningdek ularni sizga taqdim etilgan maqsadlardan boshqa maqsadlarda ishlatish huquqiga ega emassiz.
11.3. Faollashuv yuz berganidan boshlab siz o‘z faoliyatingiz davomida to‘playdigan va qayta ishlaydigan Shaxsiy axborotga nisbatan mustaqil shaxsiy ma’lumotlar operatoriga aylanishingiz mumkin. Bunday hollarda sizga tatbiq etiladigan majburiyatlar Tadbirkorlik faoliyatini yuritish bo‘yicha Qo‘shimchaning 6-bandida bayon etilgan.
11.4. Biz barcha Shaxsiy ma’lumotlar xavfsizligini ta’minlash majburiyatini olamiz. Bunday ma’lumotlar himoyalangan serverlarda saqlanadi va ularni qayta ishlash shaxsiy ma’lumotlarni himoya qilish to‘g‘risidagi amaldagi qonunchilikning barcha talablariga muvofiq amalga oshiriladi.
11.5. Shaxsiy ma’lumotlarni himoya qilish va shaxsiy hayot daxlsizligi to‘g‘risidagi amaldagi qonunchilik talablarini buzishingiz natijasida sizda yuzaga kelishi mumkin bo‘lgan har qanday jarimalar, xarajatlar, sarf-xarajatlar, yig‘imlar yoki boshqa zararlar uchun biz javobgar emasmiz.
12. TOVAR BELGILARI, MUALLIFLIK HUQUQLARI VA KONTENT
12.1. Oriflame nomi, Oriflame logotipi, shuningdek Mahsulotlar va mahsulot liniyalarining nomlari Oriflame tovar belgilari hisoblanadi. Do‘konda joylashtirilgan boshqa barcha belgilar ularning tegishli huquq egalariga tegishli bo‘lib, ular Oriflame bilan bog‘liq bo‘lishi ham, bog‘liq bo‘lmasligi ham mumkin
12.2. Do‘konda joylashtirilgan barcha materiallar, jumladan dasturiy ta’minot, matnlar, tasvirlar, videomateriallar, audiomateriallar va ma’lumotlar bazalari (keyingi o‘rinlarda birgalikda “Kontent” deb yuritiladi), Oriflame, uning ta’minotchilari yoki boshqa huquq egalariga tegishli bo‘lib, intellektual mulk to‘g‘risidagi qonunchilik bilan himoyalanadi. Agar biz tomonidan yozma ravishda ruxsat berilmagan bo‘lsa yoki mazkur Shartlarda bevosita nazarda tutilmagan bo‘lsa, siz Kontentdan yoki har qanday tovar belgilaridan to‘liq yoki qisman foydalanish, ularni nusxalash, o‘zgartirish, tarqatish, dekompilyatsiya qilish, teskari muhandislik usullarini qo‘llash yoki boshqa tarzda foydalanish huquqiga ega emassiz. Mazkur Shartlarda aniq nazarda tutilgan holatlardan tashqari, ularning hech bir qoidasi sizga Kontentdan, Oriflame tovar belgilaridan yoki Oriflame hamda uchinchi shaxslarga tegishli boshqa intellektual mulk obyektlaridan foydalanish uchun litsenziya yoki boshqa huquq bermaydi.
12.3. Siz Kontentdan noqonuniy maqsadlarda foydalanmaslik, bizning yoki uchinchi shaxslarning huquqlarini buzmaslik, shuningdek Do‘konning normal ishlashiga aralashmaslik hamda hisob qaydnomangizdan foydalanuvchi uchinchi shaxslarning bunday aralashuviga yo‘l qo‘ymaslik majburiyatini olasiz. Bunga Do‘konning ma’muriy bo‘limlariga ruxsatsiz kirishga urinishlar ham kiradi.
13. BITIMNING AMAL QILISH MUDDATI, BEKOR QILINISHI, TUGATILISHI VA O‘ZGARTIRILISHI
13.1. Bitim noma’lum muddatga tuziladi va 2.4-bandga muvofiq biz tomonidan sizning ro‘yxatdan o‘tganingiz tasdiqlangan kundan boshlab kuchga kiradi.
13.2. Agar siz ketma-ket 5 (besh) yil davomida birorta ham buyurtma rasmiylashtirmagan bo‘lsangiz, Bitim avtomatik ravishda o‘z kuchini yo‘qotadi. Bunday hollarda Bitimning amal qilishi tugaydi, sizning ro‘yxatdan o‘tganingiz va hisob qaydnomangiz yopiladi hamda Oriflame Mukofotlar Rejasi doirasida olingan har qanday maqomlar va mukofotlarga bo‘lgan to‘plangan huquqlar bekor qilinadi. Yuqoridagilarga qaramay, Oriflame Bitim bekor qilingandan keyin ham hisob qaydnomangizga oid ayrim ma’lumotlarni amaldagi huquqiy, tartibga soluvchi, soliq, buxgalteriya va audit talablariga rioya qilish, qonuniy da’volarni belgilash, amalga oshirish yoki himoya qilish, shuningdek amaldagi qonunchilikda ruxsat etilgan yoki talab qilingan boshqa hollarda zarur bo‘lgan muddat davomida saqlab qolish huquqiga ega.
13.3. 13.2-bandda nazarda tutilgan Bitim bekor qilinishining taxminiy sanasidan kamida 30 (o‘ttiz) kun oldin biz sizga bekor qilinish sanasi, uning oqibatlari va bunday bekor qilinishning oldini olish uchun bajarilishi kerak bo‘lgan harakatlar to‘g‘risidagi ma’lumotlarni o‘z ichiga olgan bildirishnoma yuboramiz.
13.4. Siz istalgan vaqtda va sabablarini ko‘rsatmasdan Mijozlarni qo‘llab-quvvatlash xizmatini xabardor qilish orqali Bitimni bekor qilishga haqlisiz. Sizning bildirishnomangizni olganimizdan so‘ng, biz uning qabul qilinganligini tasdiqlaymiz. Bitimning bekor qilinishi allaqachon rasmiylashtirilgan va qabul qilingan buyurtmalarga, shuningdek bekor qilish sanasidan oldin sizga yetkazib berilgan Mahsulotlarga oid huquqlaringizga ta’sir qilmaydi.
13.5. Biz o‘z xohishimizga ko‘ra sizni bir oy oldin xabardor qilgan holda yoki quyidagi hollarning istalgan birida darhol Bitimni bekor qilish huquqiga egamiz: (a) siz muhim darajada noto‘g‘ri yoki ishonchsiz ma’lumotlar yoxud Shaxsiy ma’lumotlarni taqdim etgan bo‘lsangiz, masalan, soxta hisob qaydnomalar yaratgan yoki boshqa shaxslarning shaxsiy ma’lumotlaridan amaldagi qonunchilik talablarini buzgan holda foydalangan bo‘lsangiz; (b) bizning oldimizdagi moliyaviy majburiyatlaringizni o‘z vaqtida bajarishga qodir bo‘lmasangiz; (c) Bitimning bartaraf etib bo‘lmaydigan buzilishiga yo‘l qo‘ygan bo‘lsangiz; (d) Bitimni, shu jumladan unda havola qilingan hujjatlarni buzgan bo‘lsangiz va agar bunday buzilish bartaraf etilishi mumkin bo‘lsa, bizning yozma bildirishnomamizni olganingizdan keyin 14 (o‘n to‘rt) kun ichida uni bartaraf etmagan bo‘lsangiz; (e) amaldagi qonunchilikka muvofiq siz bilan shartnomaviy munosabatlarni davom ettirish Oriflame yoki Oriflame Guruhining boshqa ishtirokchisi uchun noqonuniy bo‘lib qolsa.
13.6. Siz tomonidan Bitim shartlarining har qanday buzilishi sizning Do‘kon yoki uning ayrim funksiyalari va imkoniyatlaridan foydalanish huquqingizni cheklashga olib kelishi mumkin. Bunday choralarni qo‘llashdan oldin biz sizni qabul qilingan qaror sabablari haqida xabardor qilish va o‘z tushuntirishlaringizni taqdim etish imkoniyatini berish uchun oqilona choralarni ko‘ramiz.
13.7. Agar biz sizdan biror majburiyatni bajarishni talab qilmasak, o‘z huquqlarimizdan foydalanmasak yoki ulardan foydalanishni kechiktirsak, bu bunday huquqlardan voz kechganimizni anglatmaydi va sizni tegishli majburiyatlarni bajarishdan ozod qilmaydi. Sizning qoidabuzarligingiz bilan bog‘liq har qanday huquqdan voz kechish yozma shaklda rasmiylashtirilishi kerak va u keyingi qoidabuzarliklar bo‘yicha huquqlardan avtomatik ravishda voz kechilganini anglatmaydi.
13.8. Biz quyidagi asoslar mavjud bo‘lganda Bitimga, shu jumladan mazkur Shartlarga o‘zgartirishlar kiritish huquqiga egamiz: (i) amaldagi qonunchilik, sud amaliyoti, sudlar, regulyatorlar yoki nazorat organlarining qarorlari, tushuntirishlari yoki tavsiyalaridagi o‘zgarishlar; (ii) Oriflame a’zosi bo‘lgan to‘g‘ridan-to‘g‘ri savdo uyushmalarining kodekslari yoki qoidalaridagi o‘zgarishlar; (iii) Do‘konning funksional imkoniyatlari, mazmuni yoki texnik talablaridagi o‘zgarishlar, shuningdek uning xavfsizligini ta’minlash yoki xatolarni tuzatish zarurati; (iv) ro‘yxatdan o‘tish tartibi yoki shartlarining o‘zgarishi; (v) mavjud to‘lov yoki yetkazib berish usullari yoxud tegishli xizmat ko‘rsatuvchi tashkilotlarning o‘zgarishi; (vi) Do‘kon faoliyati yoki Mahsulotlarni yetkazib berish bilan bog‘liq xarajatlarning o‘zgarishi; (vii) siz bilan shartnoma tuzuvchi Oriflame yuridik shaxsining yoki Mahsulotlarni yetkazib berish tartibining o‘zgarishi; (viii) Oriflame Mukofotlar Rejasi, Tijorat dasturlari yoki Siyosatlar va tartib-taomillardagi o‘zgarishlar. O‘zgartirishlar ular kuchga kirishidan oldin rasmiylashtirilgan va qabul qilingan buyurtmalarga nisbatan qo‘llanilmaydi.
13.9. Bitimning har qanday o‘zgartirilgan, to‘ldirilgan yoki yangi tahriri bizning Saytimizda e’lon qilinadi va/yoki ro‘yxatdan o‘tishda ko‘rsatgan elektron pochta manzilingizga yuboriladi hamda tegishli e’lon yoki bildirishnomada ko‘rsatilgan sanada, biroq e’lon qilingan yoki yuborilgan kundan kamida 30 (o‘ttiz) kun o‘tgach kuchga kiradi. Biz sizdan o‘zgarishlarga aniq rozilik berishingizni talab qilishimiz mumkin. Aks holda, agar siz o‘zgartirishlar kuchga kirganidan keyin buyurtmalar berishda va/yoki Tadbirkorlik faoliyatini yuritish bo‘yicha Qo‘shimchaga muvofiq faoliyat yuritishda davom etsangiz, o‘zgartirishlarni qabul qilgan deb hisoblanasiz. Agar siz o‘zgarishlarga rozi bo‘lmasangiz, ular kuchga kirishidan oldin Bitimni bekor qilishga haqlisiz.
13.10. Biz Do‘kon yoki uning istalgan qismini asosli sabablar mavjud bo‘lganda, jumladan Do‘kon yoki u orqali taqdim etiladigan xizmatlarga taalluqli qonunchilikdagi o‘zgarishlar, bunday xizmatlar hajmidagi o‘zgarishlar yoki mavjud texnik funksiyalardagi o‘zgarishlar sababli o‘zgartirish huquqiga egamiz. Agar bunday o‘zgarishlar sizning Do‘kondan foydalanishingizga sezilarli va salbiy ta’sir ko‘rsatishi mumkin bo‘lsa, biz bu haqda sizni oldindan xabardor qilamiz.
14. SHIKOYATLARNI KO‘RIB CHIQISH VA NIZOLARNI HAL ETISH
14.1. Agar siz Mahsulot sifati yoki biz tomonidan ko‘rsatilayotgan xizmatlarning biror jihatidan qoniqmasangiz, iltimos, Mijozlarni qo‘llab-quvvatlash xizmatiga murojaat qiling. Shikoyat yuborayotganda, murojaatingizni tegishli tarzda ko‘rib chiqishimiz uchun shikoyat mavzusini hamda uni hal etishning siz istagan usulini ko‘rsatishingizni so‘raymiz.
14.2. Biz sizning shikoyatingizni ko‘rib chiqamiz va u kelib tushgan kundan boshlab 14 (o‘n to‘rt) kun ichida mustahkam axborot tashuvchisi orqali javob taqdim etamiz. Agar murojaatni ko‘rib chiqish uchun qo‘shimcha vaqt talab etilsa, bu haqda sizni xabardor qilamiz.
14.3. Biz nizolarni muqobil nizolarni hal etish tartib-taomillari orqali hal qilish majburiyatini o‘z zimmamizga olmaymiz. Mazkur qoida sizning sudga murojaat qilish huquqingizni, shuningdek iste’molchilar huquqlarini himoya qilish bo‘yicha vakilga, iste’molchilar huquqlarini himoya qilish tashkilotiga yoki iste’molchilar huquqlarini himoya qilish bo‘yicha vakolatli davlat organiga murojaat qilish huquqingizni cheklamaydi (ushbu Shartlarning 6.5-bandiga qarang).
15. AMAL QILINADIGAN QONUNCHILIK VA YURISDIKSIYA
Mazkur Shartlar Hudud qonunchiligiga muvofiq tartibga solinadi va talqin qilinadi. Mazkur Shartlardan kelib chiqadigan yoki ular bilan bog‘liq har qanday nizolar Hududning vakolatli sudlari tomonidan ko‘rib chiqiladi. Shu bilan birga, mazkur Shartlarning hech bir qoidasi sizga yashayotgan mamlakatingiz qonunchiligida nazarda tutilgan iste’molchilar huquqlarini himoya qilish bo‘yicha majburiy huquqlarni cheklamaydi yoki istisno qilmaydi. Shuningdek, nizolarni ko‘rib chiqish uchun yurisdiksiyani tanlashga doir qonunchilikda belgilangan iste’molchi huquqlariga ham ta’sir qilmaydi.
16. YAKUNIY QOIDALAR
16.1. Oriflame Butunjahon To‘g‘ridan-to‘g‘ri Savdo Assotsiatsiyalari Federatsiyasi (WFDSA) Axloq kodeksi talablariga rioya qiladi. Tadbirkorlik faoliyatini yuritish bo‘yicha Qo‘shimcha tatbiq etiladigan Brend Hamkorlar ushbu kodekslarga, ularning qoidalari Axloq kodeksi va xulq-atvor qoidalarida aks ettirilgan shaklda, rioya qilishlari shart. Mazkur hujjatlarning nusxalarini Mijozlarni qo‘llab-quvvatlash xizmati orqali ham olish mumkin.
16.2. Mazkur Shartlarni qabul qilish orqali siz bizning Bitim bo‘yicha huquq va majburiyatlarimizni boshqa tashkilotga, shu jumladan Oriflame Guruhiga kiruvchi har qanday kompaniyaga o‘tkazish huquqimiz borligiga rozilik bildirasiz. Bunday o‘tkazish mazkur Shartlar bo‘yicha sizning huquqlaringizga va bizning majburiyatlarimizga ta’sir qilmaydi.
16.3. Siz mazkur Shartlar bo‘yicha o‘z huquq va majburiyatlaringizni boshqa shaxsga faqat bizning oldindan yozma roziligimiz orqali o‘tkazishingiz mumkin.
16.4. Har bir shartnoma faqat siz va biz o‘rtamizda tuziladi. Hech bir uchinchi shaxs uning biron-bir qoidasi bajarilishini talab qilish huquqiga ega emas.
16.5. Agar mazkur Shartlarning biron-bir qoidasi har qanday sababga ko‘ra noqonuniy, haqiqiy emas yoki majburiy ijro etilishi mumkin emas deb topilsa, bunday qoidaning haqiqiy emasligi mazkur Shartlarning boshqa qoidalarining haqiqiyligi va ijro etilishiga ta’sir qilmaydi.
16.6. Odatda Bitim va sizning buyurtmalaringizga oid ma’lumotlar hamda bildirishnomalar sizga elektron pochta yoki shaxsan sizga yo‘naltirilgan boshqa elektron aloqa vositalari orqali yuboriladi. Elektron pochta orqali yuborilgan bildirishnoma yuborilganidan keyingi ish kunida olingan deb hisoblanadi. Pochta jo‘natmasi orqali yuborilgan bildirishnoma yuborilganidan keyingi ikkinchi ish kunida olingan deb hisoblanadi. Boshqa usulda yuborilgan bildirishnoma esa adresat tomonidan amalda qabul qilingan kunda olingan deb hisoblanadi.
16.7. Oriflame elektron pochta serverlari ma’murlari tomonidan sizning elektron pochta manzilingizga yuborilgan xabarlar yoki bildirishnomalarning bloklanishi, shuningdek qurilmangizga o‘rnatilgan dasturiy ta’minot tomonidan elektron xabarlarning o‘chirilishi yoki bloklanishi uchun javobgar emas. Buyurtmalaringiz bilan bog‘liq xabarlarni o‘tkazib yubormaslik uchun “Spam”, “Keraksiz pochta” va shunga o‘xshash papkalarni muntazam tekshirib turishingizni tavsiya qilamiz.
16.8. Mazkur Shartlarning qoidalari ularda havola qilingan boshqa hujjatlarga nisbatan ustuvor kuchga ega, bundan Tadbirkorlik faoliyatini yuritish bo‘yicha Qo‘shimcha bilan tartibga solingan holatlar mustasno. Bunday hollarda Tadbirkorlik faoliyatini yuritish bo‘yicha Qo‘shimcha qoidalari ushbu hujjatning 1.3-bandiga muvofiq ustuvor kuchga ega bo‘ladi.
16.9. Biz Do‘konimizda joylashtirilgan Mahsulot fikr-mulohazalarni, ular haqiqatan ham tegishli Mahsulotni xarid qilgan va undan foydalangan xaridorlar tomonidan qoldirilganligini tasdiqlash maqsadida tekshiramiz. Bunday hollarda fikr “Tasdiqlangan xaridor” tomonidan qoldirilgan deb belgilanadi. Agar fikr-mulohazani qoldirgan shaxsning tasdiqlangan xaridor ekanligini aniqlay olmasak, bunday sharh “Rag‘batlantiuvchi fikr-mulohaza” deb belgilanadi.
16.10. Agar siz Mahsulotlarni Iste’molchi sifatida, ya’ni to‘liq yoki asosan o‘zingizning savdo, tadbirkorlik yoki kasbiy faoliyatingiz bilan bog‘liq bo‘lmagan maqsadlarda xarid qilsangiz, amaldagi qonunchilikda iste’molchilarga taqdim etilgan barcha huquqlardan foydalanasiz. Bitimdagi hech bir qoida bunday huquqlarni cheklamaydi yoki istisno qilmaydi.
BIZNING ASOSIY REKVIZITLARIMIZ
«ORIFLAME» XK MChJ Xorijiy korxona shaklidagi mas’uliyati cheklangan jamiyat
Manzil: O‘zbekiston Respublikasi, 100084, Toshkent shahri, Yunusobod tumani, Amir Temur ko‘chasi, 88A-uy.
Aloqa ma’lumotlari:
Telefon: +99871 205 00 88
Elektron pochta: info@oriflame.uz
Ro‘yxatdan o‘tish raqami: 693503 28.02.2019 yil
QQS to‘lovchining raqami: 326100038138
Mazkur Shartlar e’lon qilingan sana: 04.10.2026
1-ILOVA
TADBIRKORLIK FAOLIYATINI YURITISH BO‘YICHA QO‘SHIMCHA
Ushbu Tadbirkorlik faoliyatini yuritish bo‘yicha Qo‘shimcha siz va Oriflame o‘rtasidagi Bitimning ajralmas qismi hisoblanadi. Unda Oriflame bilan biznes hamkorligingizga oid qo‘shimcha huquq va majburiyatlar belgilangan. Siz uni ro‘yxatdan o‘tish vaqtida qabul qilasiz, biroq uning qoidalari sizga faqat Faollashuv yuz bergan paytdan boshlab tatbiq etiladi. Faollashuv deganda siz tomonidan jalb qilingan shaxsning Oriflame-da ro‘yxatdan o‘tishi tushuniladi (Shartlarning 10.2-bandiga muvofiq).
1. QO‘LLASH SOHASI
1.1. Mazkur Tadbirkorlik faoliyatini yuritish bo‘yicha Qo‘shimcha sizga Faollashuv yuz bergan paytdan boshlab (ushbu atama Shartlarning 10.2-bandida belgilanganidek) tatbiq etiladi. Mazkur sanadan boshlab siz Oriflame biznesni rivojlantirish dasturining ishtirokchisi hisoblanasiz va sizga ushbu Tadbirkorlik faoliyatini yuritish bo‘yicha Qo‘shimcha hamda uning ilovalarida nazarda tutilgan qo‘shimcha huquqlar, majburiyatlar, imtiyozlar va mukofotlarni olish shartlari qo‘llaniladi.
1.2. Mazkur Tadbirkorlik faoliyatini yuritish bo‘yicha Qo‘shimcha Shartlar qoidalarini takrorlamaydi. Shartlar sizga to‘liq hajmda tatbiq etilishda davom etadi, jumladan Mahsulotlarni xarid qilish, yetkazib berish, Mahsulotlarning shartnoma shartlariga muvofiqligi, Mahsulotlar xavfsizligi, shikoyatlarni ko‘rib chiqish, qo‘llaniladigan qonunchilik va yurisdiksiya masalalarida.
1.3. Mazkur Tadbirkorlik faoliyatini yuritish bo‘yicha Qo‘shimcha bilan tartibga solinadigan masalalar bo‘yicha Shartlar va ushbu Qo‘shimcha o‘rtasida ziddiyat yuzaga kelgan taqdirda, ushbu Tadbirkorlik faoliyatini yuritish bo‘yicha Qo‘shimcha qoidalari ustuvor kuchga ega bo‘ladi. Mazkur qoida sizning shaxsiy foydalanish uchun xarid qilingan Mahsulotlarga nisbatan Iste’molchi sifatidagi huquqlaringizga tatbiq etilmaydi va bunday huquqlarni cheklamaydi.
1.4. Mazkur Tadbirkorlik faoliyatini yuritish bo‘yicha Qo‘shimchaga quyidagi ilovalar biriktirilgan: 1-ilova - Oriflame Mukofotlar Rejasi; 2-ilova - Etika kodeksi va xulq-atvor qoidalari; 3-ilova - Siyosatlar va tartib-taomillar. Mazkur ilovalar ushbu Tadbirkorlik faoliyatini yuritish bo‘yicha Qo‘shimchaning ajralmas qismi hisoblanadi va sizga Faollashuv yuz bergan paytdan boshlab tatbiq etiladi.
2. SIZNING MAQOMINGIZ
2.1. Mazkur Tadbirkorlik faoliyatini yuritish bo‘yicha Qo‘shimcha doirasidagi har qanday faoliyatni amalga oshirishda siz har doim o‘z nomingizdan va o‘z hisobingizdan harakat qilasiz. Agar siz Mahsulotlarni targ‘ib qilishga qaror qilsangiz, siz mustaqil shaxs (o‘zini o‘zi band qilgan shaxs yoki yakka tartibdagi tadbirkor) sifatida faoliyat yuritasiz va shunday faoliyat yuritishingiz shart, Oriflame-ning agenti, xodimi yoki boshqa vakili sifatida emas. Siz Oriflame va boshqa Brend Hamkorlar yoki uchinchi shaxslar o‘rtasida shartnomalar tuzish bo‘yicha muzokaralar olib borish yoki vositachilik qilish vakolatiga ega emassiz. Shuningdek, siz Oriflame yoki Oriflame Guruhiga kiruvchi boshqa har qanday kompaniya nomidan yoki topshirig‘i bilan biror mahsulotni xarid qilish, sotish yoki boshqa har qanday bitimlarni tuzish vakolatiga ega emassiz. Siz o‘zingizni Oriflame-ning vakolatli distribyutori sifatida ko‘rsatishga haqli emassiz. Siz Hududning amaldagi qonunchiligida nazarda tutilgan ma’noda tijorat agenti emasligingizni tasdiqlaysiz va bunga rozilik bildirasiz hamda ushbu munosabatlar tugatilishi munosabati bilan har qanday kompensatsiya, zararlarning qoplanishi yoki boshqa to‘lovlarni talab qilish huquqiga ega emassiz.
2.2. Bitimdagi hech bir qoida siz va Oriflame o‘rtasida mehnat munosabatlarini, sheriklik munosabatlarini yoki birgalikdagi faoliyat (qo‘shma korxona) munosabatlarini yuzaga keltirmaydi. Siz har qanday faoliyatni amalga oshirish yoki amalga oshirmaslik, uni qachon va qanday hajmda amalga oshirish to‘g‘risidagi qarorlarni mustaqil ravishda qabul qilasiz.
2.3. Oriflame sizning faoliyatingiz muayyan darajadagi daromad, mukofot yoki boshqa foyda keltirishini kafolatlamaydi va bunday da’vo bilan chiqmaydi.
3. QONUNCHILIK TALABLARIGA RIOYA QILISH, RUXSATNOMALAR VA SOLIQQA TORTISH
3.1. Agar siz mazkur Tadbirkorlik faoliyatini yuritish bo‘yicha Qo‘shimcha doirasida yoki Mahsulotlar bilan bog‘liq boshqa har qanday faoliyatni amalga oshirishga qaror qilsangiz, Hudud qonunchiligida talab etilgan barcha ruxsatnomalar, litsenziyalar va boshqa zarur kelishuvlarni mustaqil ravishda olishingiz, shuningdek barcha zarur ro‘yxatdan o‘tish jarayonlaridan o‘tishingiz shart. Bunga, jumladan, shaxsiy ma’lumotlarni himoya qilish to‘g‘risidagi qonunchilik talablariga rioya etish maqsadidagi ro‘yxatdan o‘tish (6-bo‘limga qarang), soliq organlarida ro‘yxatdan o‘tish hamda soliq hisobotlarini taqdim etish kiradi. Siz bunday faoliyat bilan bog‘liq ravishda to‘lanishi lozim bo‘lgan har qanday soliqlar, yig‘imlar, majburiy to‘lovlar, ijtimoiy sug‘urta badallari va boshqa to‘lovlarni hisoblash, deklaratsiya qilish hamda to‘lash uchun yakka tartibda javobgarsiz. Shuningdek, siz Shaxsiy axborotdan foydalanish bilan bog‘liq har qanday harakatlarning amaldagi shaxsiy ma’lumotlarni himoya qilish va shaxsiy hayot daxlsizligi to‘g‘risidagi qonunchilik talablariga to‘liq muvofiqligini ta’minlash uchun ham yakka tartibda javobgarsiz. Amaldagi qonunchilik va mahalliy amaliyotga muvofiq, biz sizdan yuqoridagi talablarning bajarilishini tekshirish yoki siz oldidagi majburiyatlarimizni bajarish maqsadida ayrim ma’lumotlar, arizalar, tasdiqlar yoki boshqa hujjatlarni taqdim etishingizni talab qilishimiz mumkin. Bunday ma’lumotlar yoki hujjatlarning taqdim etilmasligi tegishli talablar bajarilgunga qadar ayrim mukofotlar, imtiyozlar yoki boshqa to‘lovlarning ushlab qolinishi, to‘xtatilishi yoki vaqtincha taqdim etilmasligiga olib kelishi mumkin.
3.2. Agar siz 16 yoshga to‘lgan, biroq 18 yoshga yetmagan bo‘lsangiz, ro‘yxatdan o‘tish vaqtida berilgan rozilik mazkur Tadbirkorlik faoliyatini yuritish bo‘yicha Qo‘shimchaga ham tatbiq etiladi. Agar Hudud qonunchiligiga ko‘ra sizning yoshingizdagi shaxs tomonidan ushbu Qo‘shimchada nazarda tutilgan faoliyatni amalga oshirish uchun qo‘shimcha rozilik, ruxsatnoma, ro‘yxatdan o‘tish yoki boshqa tasdiqlash talab etilsa, tegishli faoliyatni boshlashdan oldin bunday rozilik, ruxsatnoma yoki ro‘yxatdan o‘tishni olishingiz shart. Biz siz tomonidan yuqoridagi talablar bajarilganligini tasdiqlovchi hujjatlar taqdim etilgunga qadar har qanday mukofotlar to‘lovini yoki boshqa imtiyozlarni taqdim etishni vaqtincha to‘xtatib turish huquqiga egamiz.
4. XULQ-ATVOR ME’YORLARI VA OBRO‘-E’TIBOR
4.1. Siz uchun majburiy hisoblangan Axloq kodeksi va xulq-atvor qoidalariga rioya qilishingiz shart
4.2. Siz Oriflame-ning ijobiy imiji va ishbilarmonlik obro‘sini saqlab qolishingiz shart. Oriflame yoki Mahsulotlarning obro‘siga putur yetkazishi mumkin bo‘lgan har qanday bayonotlarni berishga yoki harakatlarni amalga oshirishga haqli emassiz. Siz o‘z faoliyatingizni qonuniy va halol tarzda olib borishingiz hamda Mahsulotlar yoki Oriflame bilan hamkorlik qilish orqali daromad olish va biznesni rivojlantirish imkoniyatlari haqida yolg‘on, chalg‘ituvchi yoki bo‘rttirilgan bayonotlar bermasligingiz shart.
4.3. Siz Oriflame tovar belgilari, Oriflame firma nomi va logotipi, bizning onlayn vositalarimiz hamda ma’lumotlar bazalarimiz Oriflame mulki ekanligini tan olasiz va ularga bo‘lgan huquqlarimizni hech qanday tarzda buzmaslik majburiyatini olasiz. Shubhalarga o‘rin qoldirmaslik uchun, Oriflame nomi bilan bog‘liq har qanday ishbilarmonlik obro‘si faqat Oriflame-ga tegishli hisoblanadi. Bizning talabimizga ko‘ra, siz ushbu holatni tasdiqlash uchun asosli ravishda talab qilinishi mumkin bo‘lgan hujjatlarni imzolashingiz shart.
4.4. Siz Bitim shartlari va unda havola qilingan materiallar, jumladan Oriflame Mukofotlar Rejasi, Tijorat dasturlari, Siyosatlar va tartib-taomillar, bizning ma’lumotlar bazalarimiz (shu jumladan Shaxsiy axborotni o‘z ichiga olgan har qanday ma’lumotlar bazalari) hamda onlayn vositalarimiz maxfiy axborot va intellektual mulk obyektlari ekanligini tan olasiz va bunga rozilik bildirasiz. Siz ulardan to‘liq yoki qisman faqat Bitimga muvofiq ruxsat etilgan faoliyat doirasida foydalanishga haqlisiz.
4.5. Mahsulotlarni, Oriflame bilan hamkorlik imkoniyatlarini, shuningdek boshqa Brend Hamkorlar uchun haq evaziga taqdim etiladigan har qanday reklama yoki o‘quv materiallarini taqdim etishda siz Etika kodeksi va xulq-atvor qoidalari talablariga qat’iy rioya qilishingiz shart.
4.6. Biz Shartlarda nazarda tutilgan tartibda Mahsulotlarni qaytarish va almashtirishga ruxsat beramiz. Bu huquq sizga, shuningdek ushbu Qo‘shimchaning 5-bo‘limida ko‘rsatilgan vosita orqali buyurtma rasmiylashtirgan bo‘lishingiz mumkin bo‘lgan shaxslarga ham tatbiq etiladi. Siz xaridorlarni Mahsulotni qaytarish huquqi haqida xabardor qilish, shuningdek ularning nomidan bunday Mahsulotlarni bizga qaytarish majburiyatini olganingizni tan olasiz va bunga rozilik bildirasiz.
4.7. Hech qanday holatda siz Oriflame nomidan marketing, reklama yoki boshqa tijorat xabarlarini yuborishga, shuningdek Oriflame nomidan bevosita yuborilgandek taassurot uyg‘otadigan tarzda Oriflame nomidan foydalanishga haqli emassiz.
5. UCHINCHI SHAXSLAR NOMIDAN BUYURTMALAR RASMIYLASHTIRISH
5.1. Istisno hollarda biz sizga maxsus onlayn vosita orqali boshqa shaxslar nomidan buyurtmalarni rasmiylashtirish imkoniyatini taqdim etishimiz mumkin. Bunday imkoniyat faqat Oriflame Mukofotlar Rejasida nazarda tutilganidek, sizning tuzilmangizga kiruvchi Brend Hamkorlarga nisbatan va faqat ularning aniq ifodalangan roziligi (vakolat berishi) mavjud bo‘lgan taqdirda taqdim etiladi. Mazkur vositadan foydalangan taqdiringizda, tegishli vakolatlarsiz buyurtmalarni rasmiylashtirish bilan bog‘liq har qanday da’volar, shuningdek shaxsiy ma’lumotlarni himoya qilish va maxfiylik to‘g‘risidagi qonunchilik talablarining har qanday buzilishi uchun yakka tartibda javobgar bo‘lasiz. Shuningdek, siz bunday buyurtma tufayli Oriflame yoki nomidan buyurtma rasmiylashtirilgan shaxsda yuzaga kelishi mumkin bo‘lgan har qanday xarajatlar, chiqimlar yoki zararlarni qoplash majburiyatini olasiz
6. SHAXSIY MA’LUMOTLARNI HIMOYA QILISH BO‘YICHA MAJBURIYATLAR
6.1. Faollashuv yuz bergan paytdan boshlab siz Oriflame Mukofotlar Rejasida nazarda tutilgan tartibda tuzilmangizdagi boshqa Brend Hamkorlarning, shuningdek Oriflame-ning onlayn xizmatlaridan tashqarida xizmat ko‘rsatiladigan xaridorlaringizning Shaxsiy axborotini (keyingi o‘rinlarda birgalikda – “Ma’lumot subyektlari”) yig‘ish, ro‘yxatga olish, saqlash, foydalanish va yangilash huquqiga ega bo‘lasiz. Siz bunday Shaxsiy axborotning mustaqil operatori sifatida shaxsiy ma’lumotlarni himoya qilish va maxfiylik to‘g‘risidagi amaldagi qonunchilikning barcha talablariga rioya qilishingizni kafolatlaysiz va bunga rozilik bildirasiz. Amaldagi qonunchilikka muvofiq sizdan vakolatli shaxsiy ma’lumotlarni himoya qilish organida ro‘yxatdan o‘tish, shuningdek shaxsiy ma’lumotlarni qayta ishlash tamoyillariga rioya qilish talab etilishi mumkin. Bunday ro‘yxatdan o‘tish zaruratini aniqlash, ro‘yxatdan o‘tish va tegishli qonunchilik talablariga rioya qilish uchun siz yakka tartibda javobgarsiz.
6.2. Shaxsiy ma’lumotlarning mustaqil operatori sifatida siz amaldagi qonunchilikka muvofiq Ma’lumot subyektlariga ularning Shaxsiy axboroti qayta ishlanishi haqida, jumladan o‘zingizning shaxsingiz va aloqa ma’lumotlaringiz to‘g‘risida axborot taqdim etishga majbur bo‘lishingiz mumkin. Oriflame-ning onlayn vositalari va kommunikatsiya tizimlari shaxsiy ma’lumotlarni qayta ishlashning shaffofligiga oid ayrim talablarning bajarilishini ta’minlash maqsadida sizning aloqa ma’lumotlaringiz va boshqa zarur axborotni tuzilmangizdagi Brend Hamkorlarga, ular bilan Oriflame vositalari orqali muloqot qilish yoki o‘zaro aloqaga kirishish jarayonida oshkor etishi mumkin. Siz ma’lumotlarni qayta ishlashning bunday tartibini tan olasiz va qabul qilasiz.
6.3. Agar siz biror shaxsni Oriflame bilan tanishtirsangiz, ushbu shaxsning Shaxsiy axborotini bevosita undan olishingiz mumkin. Bunda siz Oriflame tomonidan vaqti-vaqti bilan sizga yetkaziladigan tartib-taomillar va ko‘rsatmalarga rioya qilishingiz, shuningdek Shaxsiy axborotdan har qanday foydalanish amaldagi qonunchilik talablariga muvofiq bo‘lishini ta’minlashingiz shart.
6.4. Siz Shaxsiy axborotni tasodifiy yoki noqonuniy yo‘q qilish, tasodifiy yo‘qotish, o‘zgartirish, ruxsatsiz oshkor qilish yoxud undan foydalanish imkoniyatini olishdan, xususan ma’lumotlarni tarmoq orqali uzatish bilan bog‘liq hollarda, shuningdek qayta ishlashning boshqa har qanday noqonuniy shakllaridan himoya qilish uchun tegishli texnik va tashkiliy xavfsizlik choralarini ko‘rishingiz shart. Texnologiyalar rivojlanishining zamonaviy darajasi, tegishli choralarni joriy etish xarajatlari hamda qayta ishlanayotgan axborotning xususiyati va hajmini hisobga olgan holda, bunday choralar ma’lumotlarni qayta ishlash bilan bog‘liq xavflarga va himoya qilinishi lozim bo‘lgan Shaxsiy axborot xususiyatiga mos xavfsizlik darajasini ta’minlashi kerak.
6.5. Siz tasodifiy yoki noqonuniy yo‘q qilish, yo‘qotish, o‘zgartirish, ruxsatsiz oshkor qilish yoki Shaxsiy axborotga ruxsatsiz kirish bilan bog‘liq bo‘lgan har qanday ma’lum xavfsizlik buzilishi haqida Oriflame-ni zudlik bilan xabardor qilishingiz shart. Bunday bildirishnoma hodisa tavsifi va ta’sir ko‘rgan axborot haqida ma’lumot bilan birga privacy@oriflame.com elektron pochta manziliga yuborilishi kerak.
6.6. Agar siz Ma’lumot subyektidan shaxsiy ma’lumotlarni himoya qilish to‘g‘risidagi qonunchilikka muvofiq uning huquqlarini amalga oshirish bo‘yicha so‘rov olsangiz, amaldagi qonunchilikda nazarda tutilgan hajmda, shuningdek Oriflame tomonidan vaqti-vaqti bilan taqdim etilishi mumkin bo‘lgan siyosatlar, tartib-taomillar va ko‘rsatmalarga muvofiq bunday so‘rovni ko‘rib chiqishingiz va bajarishingiz shart.
6.7. Siz Shaxsiy axborotni faqat tegishli Ma’lumot subyektlariga taqdim etilgan Maxfiylik to‘g‘risidagi bildirishnomaga muvofiq qayta ishlashga haqlisiz. Oriflame bilan munosabatlaringiz tugaganidan so‘ng, siz o‘zingizning egaligingizda yoki nazoratingiz ostida bo‘lgan barcha Shaxsiy axborotni amaldagi qonunchilik va Oriflame Maxfiylik to‘g‘risidagi bildirishnomasi talablariga muvofiq yo‘q qilishingizni kafolatlaysiz va bunga rozilik bildirasiz.
7. ORIFLAME HAMJAMIYATI VA MARKETING KOMMUNIKATSIYALARI
7.1. Faollashuv yuz bergan paytdan boshlab siz, amaldagi qonunchilik talablariga hamda xabarlarni qabul qilish bo‘yicha oluvchilarning afzalliklariga muvofiq ravishda va oqilona vaqt oralig‘ida, Oriflame Mukofotlar Rejasida nazarda tutilgan tartibda o‘z tuzilmangizdagi Brend Hamkorlarga Oriflame, Mahsulotlar, Oriflame Hamjamiyati va tegishli hamkorlik imkoniyatlariga oid ma’lumotlarni (keyingi o‘rinlarda – “Hamjamiyat kommunikatsiyalari”) yuborish huquqiga egasiz. Bizning onlayn vositalarimiz sizga 7.2-bandda belgilangan shartlarga rioya qilgan holda bunday shaxslarning Shaxsiy axborotidan Hamjamiyat kommunikatsiyalarini yuborish maqsadida foydalanish imkoniyatini berishi mumkin.
7.2. Hamjamiyat kommunikatsiyalari, shuningdek siz tomonidan yuboriladigan har qanday marketing xabarlari: (a) faqat Oriflame, Mahsulotlar, Oriflame Hamjamiyati hamda ular bilan bog‘liq hamkorlik imkoniyatlari, xizmatlar yoki tadbirlarga taalluqli bo‘lishi; (b) tegishli turdagi xabar sifatida aniq identifikatsiya qilinishi hamda oluvchi nima sababdan mazkur xabarni olayotgani va kommunikatsiyalar bo‘yicha o‘z afzalliklarini qanday o‘zgartirishi yoki yangilashi mumkinligi haqidagi ma’lumotni o‘z ichiga olishi; (c) yuboruvchi sifatida sizning ismingiz va aloqa ma’lumotlaringizni, shuningdek amaldagi qonunchilik talab qilgan hollarda, keyingi xabarlarni olishni rad etish tartibi haqidagi ma’lumotni o‘z ichiga olishi; (d) kommunikatsiya sozlamalari bunday xabarlarni olishni istamasligini ko‘rsatgan shaxslarga yoki amaldagi qonunchilikka muvofiq zarur rozilikni bermagan shaxslarga yuborilmasligi; (e) Bitim qoidalariga, shuningdek kommunikatsiyalar, marketing, reklama, shaxsiy ma’lumotlarni himoya qilish va maxfiylik sohasidagi barcha amaldagi qonunchilik talablariga muvofiq bo‘lishi shart.
7.3. Chegirmalar, mukofotlar, bonuslar, sovg‘alar va boshqa rag‘batlantirishlar kabi reklama takliflari, agar amaldagi qonunchilik bunga ruxsat bersa, reklama takliflari sifatida aniq belgilanishi kerak. Bunday imtiyozlarni olish shartlari oson topiladigan, tushunarli, shaffof va bir ma’noli bo‘lishi lozim.
7.4. Siz yuborayotgan xabarlar va ularning amaldagi qonunchilik talablariga, shuningdek oluvchilarning kommunikatsiya afzalliklariga muvofiqligi uchun to‘liq javobgarsiz. Siz xaridorlaringizning marketing afzalliklari hisobini yuritishingiz, jumladan ularning xabarlarni olishga rozilik bergan sanasi va ushbu rozilikning aniq hajmini qayd etishingiz, shuningdek rozilikning qaytarib olinishi yoki kommunikatsiya afzalliklaridagi har qanday o‘zgarishlarni zudlik bilan inobatga olishingiz shart.
8. ORIFLAME MUKOFOTLAR REJASI
8.1. Faollashuv yuz bergan paytdan boshlab, siz Bitim qoidalari va Hudud qonunchiligi talablariga rioya qilgan holda, Oriflame Mukofotlar Rejasida nazarda tutilgan imtiyozlar va mukofotlarni olish huquqiga ega bo‘lasiz. Mazkur imtiyozlar va mukofotlar bevosita Oriflame, Oriflame Guruhining boshqa kompaniyasi yoki jalb qilingan uchinchi tomon xizmat ko‘rsatuvchisi tomonidan taqdim etilishi mumkin.
8.2. Mukofotlarni, shu jumladan pul to‘lovlarini olish uchun biz sizdan muayyan xizmat ko‘rsatuvchi provayderdan foydalanishni talab qilishimiz mumkin va bunday provayderdan foydalanish tegishli mukofotlarni olishning majburiy sharti bo‘lishi mumkin. Bundan tashqari, amaldagi qonunchilik yoki bunday xizmat ko‘rsatuvchi provayder talablari nazarda tutgan hollarda, sizdan shaxsni tasdiqlovchi hujjatlar, soliq ma’lumotlari hamda shaxsni tasdiqlash (identifikatsiya) tartib-taomilidan o‘tish talab qilinishi mumkin. Biz ushbu talablar bajarilgunga qadar mukofotlar to‘lovini vaqtincha to‘xtatib turish huquqiga egamiz.
8.3. Oriflame Oriflame Mukofotlar Rejasi yoki har qanday Tijorat dasturining mavjudligi, uzluksiz ishlashi yoki funksionalligiga oid hech qanday kafolat bermaydi. Shuningdek, Oriflame bunday dasturlarda ishtirok etish natijasida muayyan darajadagi daromad, mukofot yoki boshqa foyda olinishi kafolatlanishini ham bildirmaydi. Oriflame Oriflame Mukofotlar Rejasini va har qanday Tijorat dasturlarini o‘zgartirish va yangilash huquqini, shu jumladan ayrim imtiyozlar, mukofotlar yoki dasturlarni bekor qilish, to‘xtatib turish yoki o‘zgartirish, shuningdek yangi imtiyozlar va dasturlarni joriy etish huquqini o‘zida saqlab qoladi.
8.4. Siz tegishli Tijorat dasturi yoki Siyosatlar va tartib-taomillar shartlariga muvofiq ayrim imtiyozlarni olish huquqiga ega bo‘lishingiz, shuningdek tegishli majburiyatlarni o‘z zimmangizga olishingiz mumkin. Oriflame bunday imtiyozlar va mukofotlarni taqdim etish shartlarini mustaqil ravishda belgilash huquqiga ega.
9. ORIFLAME MAJBURIYATLARI VA QO‘SHIMCHA DASTURLAR
9.1. Siz tomonidan Iste’molchi sifatida emas, balki boshqa maqomda rasmiylashtirilgan buyurtmalarga nisbatan, buyurtma qilingan Mahsulotlar mavjud bo‘lgan taqdirda, biz ularni yetkazib berishni amalga oshiramiz. Amaldagi qonunchilik ruxsat bergan eng yuqori darajada, biz omborda Mahsulotlar mavjud emasligi, Mahsulotlar yetishmasligi yoki mavjud emasligi sababli ularni yetkazib berishning imkonsizligi uchun javobgarlikni istisno qilamiz.
9.2. Siz bir yoki bir nechta onlayn vositalar, tizimlar yoki dasturiy yechimlar (keyingi o‘rinlarda - “Onlayn vositalar”) yordamida yangi ishtirokchilarni jalb qilish dasturlarida qatnashish huquqiga ega bo‘lishingiz mumkin. Sizga faoliyatingizni amalga oshirish bilan bog‘liq holda Onlayn vositalardan foydalanish uchun mutlaq bo‘lmagan, boshqa shaxsga o‘tkazib bo‘lmaydigan va cheklangan huquq beriladi. Yangi ishtirokchilarni jalb qilish dasturida ishtirok etish va u bilan bog‘liq imtiyozlarni olish Bitim shartlariga, shuningdek amaldagi Siyosatlar va tartib-taomillar talablariga rioya qilishingizga bog‘liq. Oriflame Onlayn vositalarning mavjudligi, uzluksiz ishlashi yoki to‘g‘ri faoliyat yuritishini kafolatlamaydi hamda oldindan xabardor qilmasdan yangi ishtirokchilarni jalb qilish dasturlarini yoki har qanday Onlayn vositani yangilash, takomillashtirish, o‘zgartirish yoki bekor qilish huquqini o‘zida saqlab qoladi.
9.3. Oriflame-ning qaroriga ko‘ra va tegishli imkoniyat mavjud bo‘lsa, siz Oriflame Xalqaro Homiylik Dasturi (XHD)da ishtirok etish huquqiga ega bo‘lishingiz mumkin. Mazkur dastur sizga yashash mamlakatingizdan tashqarida Oriflame Mukofotlar Rejasi doirasida faoliyat yuritish imkoniyatini beradi. Siz XHDda ishtirok etish uchun quyidagi universal havola orqali bepul ro‘yxatdan o‘tishingiz mumkin: [HAVOLA]. Arizangiz biz tomonidan qabul qilinganidan va sizga noyob XHD ishtirokchisi kodi berilganidan so‘ng, siz XHD ishtirokchisi sifatida ro‘yxatdan o‘tkazilasiz. Oriflame o‘z xohishiga ko‘ra har qanday arizani qabul qilish yoki rad etish huquqini o‘zida saqlab qoladi. XHDda ishtirok etayotganda siz mahalliy qonunchilik talablariga, Oriflame-ning mahalliy shartlari va qoidalariga, shuningdek ushbu dastur doirasida faoliyat yuritayotgan barcha mamlakatlardagi amaldagi normativ talablarga rioya qilishingiz shart. XHDda ishtirok etish, shu jumladan u bilan bog‘liq har qanday imtiyozlarni olish, Bitim shartlari hamda amaldagi Siyosatlar va tartib-taomillar talablariga rioya qilishingizga bog‘liq. Oriflame XHDning mavjudligi, uzluksiz faoliyati yoki to‘g‘ri ishlashini kafolatlamaydi va oldindan xabardor qilmasdan istalgan vaqtda XHDni yangilash, o‘zgartirish, vaqtincha to‘xtatish yoki bekor qilish, shu jumladan dasturda ishtirok etuvchi mamlakatlar ro‘yxatini o‘zgartirish huquqini o‘zida saqlab qoladi. XHD yoki faoliyat yuritilayotgan mamlakatlarda amal qiluvchi talablar haqida qo‘shimcha ma’lumot olish uchun Mijozlarni qo‘llab-quvvatlash xizmatiga murojaat qiling.
10.TADBIRKORLIK FAOLIYATINI TO‘XTATISH, SOVISH DAVRI VA QAYTA SOTIB OLISH
10.1. Siz istalgan vaqtda va sabablarini ko‘rsatmasdan mazkur Tadbirkorlik faoliyatini yuritish bo‘yicha Qo‘shimcha doirasidagi faoliyatni to‘xtatish niyatingiz haqida bizni xabardor qilishga haqlisiz. Buning uchun siz Mijozlarni qo‘llab-quvvatlash xizmatiga elektron pochta orqali murojaat qilishingiz yoki yozma bildirishnoma yuborishingiz mumkin, jumladan Faoliyatni to‘xtatish to‘g‘risidagi bildirishnoma shaklidan foydalanishingiz mumkin. Sizning bildirishnomangizni olganimizdan so‘ng, biz uning qabul qilinganligini zudlik bilan tasdiqlaymiz. Bunday bildirishnoma olingan paytdan boshlab siz va Oriflame o‘rtasidagi Bitim bekor qilingan hisoblanadi.
10.2. Agar 10.1-bandda nazarda tutilgan bildirishnoma Faollashuv yuz berganidan keyin 30 (o‘ttiz) kalendar kun ichida yuborilgan bo‘lsa, biz faoliyatni amalga oshirish bilan bog‘liq ravishda siz tomonidan Oriflame-ga to‘langan barcha yig‘imlar va xarajatlarni (agar mavjud bo‘lsa) qaytarib beramiz, buyurtma qilingan, biroq hali yetkazib berilmagan barcha Mahsulotlar yoki xizmatlar bo‘yicha buyurtmalarni bekor qilamiz hamda siz xarid qilgan barcha Mahsulotlarni (jumladan o‘quv va reklama materiallari, biznes yuritish bo‘yicha qo‘llanmalar va boshlang‘ich to‘plamlarni) qaytarib olamiz. Xavfsizlik va gigiyena talablaridan kelib chiqib, agar qadoq ochilgani sababli Mahsulot endi xarid qilingan holatda bo‘lmasa, biz bunday Mahsulotni qaytarib olishni rad etish huquqiga egamiz. Bunday Mahsulotlar qiymati ular bizga topshirilgandan keyin, yoki agar Mahsulotlar hali yetkazib berilmagan bo‘lsa, imkon qadar qisqa oqilona muddat ichida qaytariladi.
10.3. Agar 10.1-bandda nazarda tutilgan bildirishnoma yuqorida ko‘rsatilgan muddatdan keyin yuborilgan bo‘lsa yoki Bitim Oriflame tashabbusi bilan sabab ko‘rsatmasdan bekor qilinsa yoxud amal qilish muddati tugashi munosabati bilan yakunlansa, sizning so‘rovingizga binoan biz quyidagi shartlar asosida Mahsulotlarni qayta sotib olishni amalga oshiramiz: (a) qaytarilayotgan Mahsulot bildirishnoma yuborilgan yoki Bitim bekor qilingan sanadan oldingi 12 (o‘n ikki) oy davomida xarid qilingan bo‘lishi kerak. Bunday holda Mahsulot qiymati uni xarid qilish uchun to‘langan dastlabki sof narxning 90 foizi miqdorida qaytariladi, bunda ushbu Mahsulotni xarid qilish bilan bog‘liq ravishda sizga avval taqdim etilgan har qanday to‘lovlar yoki mukofotlar chegirib tashlanadi; (b) qaytarilayotgan Mahsulot sotuv ko‘rinishini saqlab qolgan bo‘lishi kerak, ya’ni foydalanilmagan, ochilmagan yoki biror tarzda o‘zgartirilmagan bo‘lishi, yaroqlilik muddati tugamagan bo‘lishi va Oriflame-ning amaldagi Kataloglarida mavjud bo‘lishi lozim.
10.4. Shuningdek, biz sizning bildirishnomangiz yuborilgan yoki Bitim bekor qilingan sanadan oldingi 30 (o‘ttiz) kun davomida Oriflame bilan hamkorlik doirasidagi faoliyatni amalga oshirish uchun to‘langan har qanday yig‘imlarni ham qaytarib beramiz.
10.5. Tadbirkorlik faoliyatini to‘xtatishingiz shaxsiy foydalanish uchun xarid qilingan Mahsulotlarga nisbatan sizning Iste’molchi sifatidagi huquqlaringizga ta’sir qilmaydi va ularni cheklamaydi.
11. TADBIRKORLIK FAOLIYATINI YURITISH BO‘YICHA QO‘SHIMCHANING AMAL QILISHI TUGATILISHI
11.1. Mazkur Tadbirkorlik faoliyatini yuritish bo‘yicha Qo‘shimcha Bitimning amal qilishi tugatilishi yoki uning amal qilish muddati yakunlanishi bilan bir vaqtda avtomatik ravishda o‘z kuchini yo‘qotadi.
11.2. Biz 13.5-bandga muvofiq Bitimni ushbu Tadbirkorlik faoliyatini yuritish bo‘yicha Qo‘shimcha bilan birgalikda bekor qilishga, shuningdek siz tomonidan Axloq kodeksi va xulq-atvor qoidalari buzilgan taqdirda ham uni tugatishga haqlimiz. Bunday qarorni qabul qilishdan oldin biz sizni qarorimiz asoslari to‘g‘risida xabardor qilish va o‘z tushuntirishlaringizni taqdim etish imkoniyatini berish uchun oqilona choralarni ko‘ramiz.
11.3. Bitim, jumladan mazkur Tadbirkorlik faoliyatini yuritish bo‘yicha Qo‘shimcha amal qilishi tugatilganidan so‘ng, Oriflame Mukofotlar Rejasi doirasida har qanday yangi imtiyozlar yoki mukofotlarni olish huquqi bekor qilinadi. Tegishli shartlar bajarilgan hollarda, mazkur Tadbirkorlik faoliyatini yuritish bo‘yicha Qo‘shimchaning 10-bo‘limi qoidalari qo‘llaniladi.
Tadbirkorlik faoliyatini yuritish bo‘yicha Qo‘shimchaga 1-ilova: Oriflame Mukofotlar Rejasi.
Tadbirkorlik faoliyatini yuritish bo‘yicha Qo‘shimchaga 2-ilova: Axloq kodeksi va xulq-atvor qoidalari.
Tadbirkorlik faoliyatini yuritish bo‘yicha Qo‘shimchaga 3-ilova: Siyosatlar va tartib-taomillar.